Zelensky refuzon t’i kërkojë falje Trump: Nuk kemi bërë diçka të gabuar

Presidenti i Ukrainës, Volodymyr Zelensky, iu drejtua mediave amerikane pas takimit të tij të tensionuar me Donald Trump në Zyrën Ovale të premten, duke u përpjekur të qetësojë tensionet me administratën amerikane.

“Gjatë gjithë kësaj kohe, jam shumë mirënjohës ndaj amerikanëve për mbështetjen e tyre,” tha Zelensky gjatë një interviste për Fox News. “Na keni ndihmuar shumë që nga fillimi… na ndihmuat të mbijetonim.”

I pyetur nëse i detyrohej një falje Trump-it, Zelensky u përgjigj: “Respektoj presidentin dhe respektoj popullin amerikan.”

“Mendoj se duhet të jemi shumë të hapur dhe të sinqertë, dhe nuk jam i sigurt nëse kemi bërë diçka të gabuar,” shtoi ai.

Më vonë, Zelensky pranoi se përplasja nuk ishte pozitive, por u shpreh i bindur se marrëdhënia e tij me Trump mund të riparohet.

“Thjesht dua të jem i sinqertë dhe dua që partnerët tanë ta kuptojnë situatën në mënyrën e duhur, ashtu siç dua ta kuptoj edhe unë gjithçka siç duhet. Kjo ka të bëjë me ne, për të mos humbur miqësinë tonë,” theksoi ai.