Presidentja Siljanovska fali Gjoko Popovskin, të dënuarin për blerjen e Mercedesit luksoz të Gruevskit

Ish-ndihmës ministri në MPB, Gjoko Popovski pjesërisht është falur me vendim të presidentes Gordana Siljanovska Davkova, të shpallur më 2 prill në Gazetën zyrtare. Me këtë, Popovski, pjesërisht lirohet nga vuajtja e mëtejshme të pjesës së mbetur nga dënimi i përbashkët me burg për rastet “300” dhe “Tank”, të hapura nga ish Prokuroria speciale publike.

Për rastin për furnizimin e 300 automjeteve për nevojat e MPB-së, Popovski, në maj të vitit 2018 u dënua në shkallë të parë me nëntë vite burg, por Gjykata e Apelit në dhjetor të vitit të njëjtë e hoqi aktvendimin e shkallës së parë dhe rastin e ktheu në rigjykim. Në tetor të vitit 2019, Popovski sërish u dënua me nëntë vite burg, që Gjykata e Apelit e zvogëloi në pesë vite.

Popovski u akuzua nga ish PSP-ja se ka kryer furnizime të 300 automjeteve për MPB në periudhën 2008-2012, me ç’rast nuk i ka respektuar rregullat ligjore për furnizim publik dhe e ka dëmtuar buxhetin për 453.570 euro.

Për rastrin Tank, për furnizimin e mercedesit, Popovski u dënua me 4,5 vite burg, ndërsa ish kryeministri Nikolla Gruevski, si nxitës i kryerjes së veprës, u dënua me dy vjet burg.

Popovski për të dy rastet kërkon dënim të kombinuar dhe zbutje, pas çka ai merr një dënim të përbashkët me tetë vjet e dy muaj, të cilin Gjykata e Apelit më pas e zvogëlon në shtatë vjet burg.

Me vendimin e Siljanovska Davkovës, janë falur tetë persona, katër prej të cilëve janë falur plotësisht dhe katër prej tyre pjesërisht.