Ministrja Federale Austriake Klaudia Plakolm në vizitë pune në EVN Maqedoni

Në ambientet e EVN Maqedoni dje u zhvillua një vizitë pune nga ministrja federale e Austrisë për Evropë, Integrim dhe Familje, znj. Klaudia Plakolm.
Në delegacion morën pjesë edhe ministrja e Energjisë, Minierave dhe Lëndëve të Para e Republikës së Maqedonisë së Veriut, znj. Sanja Bozhinovska, si dhe Shkëlqesia e Tij Martin Pammer, ambasador i Republikës së Austrisë në vend, së bashku me përfaqësues nga ambasada..

Gjatë vizitës, të ftuarit patën mundësi të njihen me arritjet e EVN Maqedoni gjatë viteve të fundit, me theks të veçantë në investimet, zhvillimin dhe zgjidhjet moderne digjitale. Brenda turit në kompani, interes të veçantë ngjalli vizita në qendrën dispeçerike – pika qendrore për menaxhimin digjital të rrjetit shpërndarës në nivel kombëtar.

Kryetari i Bordit Drejtues të EVN Maqedoni, z. Wollfgang Maier, në fjalën e tij përshëndetëse theksoi se ligjet dhe rregulloret që po krijohen në Ministrinë e sapoformuar të Energjisë janë jashtëzakonisht përparimtare dhe plotësisht të harmonizuara me tregun evropian, gjë që e pozicionon Maqedoninë në hartën energjetike të Evropës edhe pse ende nuk është anëtare e BE-së.

Ministrja e Energjisë, Minierave dhe Lëndëve të Para, znj. Sanja Bozhinovska, theksoi se EVN Maqedoni mund të shërbejë si shembull se si një kompani e huaj duhet të bashkëpunojë me institucionet shtetërore, duke investuar jo vetëm në veprimtarinë e saj, por edhe në shoqëri.

Ministrja austriake për Evropë, Integrim dhe Familje, znj. Klaudia Plakolm, shprehu kënaqësi për vizitën dhe theksoi se është e impresionuar nga sinergjia ndërmjet sektorit privat dhe atij publik, si dhe nga mënyra se si institucionet në vend krijojnë kushte për mbështetje dhe prosperitet të kompanive, duke e veçuar bashkëpunimin ndërmjet Ministrisë së Energjisë dhe EVN-së si një shembull pozitiv.

Në kuadër të vizitës u theksua edhe bashkëpunimi shumëvjeçar ndërmjet Austrisë dhe Maqedonisë së Veriut në fushën e energjetikës, i cili përfaqëson një shembull të shkëlqyer të shkëmbimit të njohurive, përvojave dhe praktikave të mira.
EVN Maqedoni, si pjesë e EVN Grupacionit austriak, mbetet e përkushtuar ndaj investimeve në modernizim, digjitalizim dhe zhvillim të qëndrueshëm, me një synim të qartë – një të ardhme energjetike të sigurt, efikase dhe të gjelbër për të gjithë konsumatorët.