Hungaria sekuestron miliona euro kesh dhe kallëpë të arit nga një autokolonë ukrainase
Autoritetet hungareze kanë ndaluar dy automjete të blinduara të një banke ukrainase që po bartnin miliona euro kesh si dhe kallëpë të arit.
Shtatë shtetas ukrainas që po e shoqëronin autokolonën u arrestuan. Zyrtarët ukrainas thanë se ukrainasit e ndaluar kishin lidhje të inteligjencës dhe lanë të kuptohej se të hollat mund të kishin prejardhje të dyshimtë.
Ministri i Jashtëm i Ukrainës, Andrii Sybiha, reagoi ashpër, duke e akuzuar Budapestin për “marrje të njerëzve peng e vjedhje të parave”, shkruan gazeta “The Guardian”.
Kryediplomati ukrainas gjithashtu e akuzoi kryeministrin hungarez me qëndrime pro ruse, Viktor Orban, për sajimin e skandalit për përfitime politike, para zgjedhjeve hungareze që pritet të mbahen muajin e ardhshëm.
Administrata kombëtare hungareze për taksa dhe dogana tha se kishte hapur një hetim për pastrim parash në lidhje me rastin, duke thënë se dërgesa përbëhej nga 40 milionë dollarë e 35 milionë euro para të gatshme si dhe 9 kilogramë ar. Kjo administratë tha se njëri nga të arrestuarit është “ish-gjeneral i shërbimit ukrainas të inteligjencës”.
Oschadbank, banka shtetërore ukrainase e kursimeve, tha se stafi i saj ishin duke transportuar para të gatshme mes Austrisë e Ukrainës në një “udhëtim rutinor”, të kryer përmes transportit tokësor për shkak të kufizimeve ndaj transportit ajror në Ukrainë.
Megjithatë, drejtori politik i Orbanit, Balazs Orban, hodhi dyshime mbi këtë dërgesë. “Automjete të blinduara plot me para kesh e ar duke lëvizur nëpër Hungari nuk janë ashtu si funksionojnë zakonisht transaksionet financiare legjitime. Pyetja e vërtetë është e thjeshtë: kush qëndron prapa këtyre të hollave dhe çfarë synojnë të financojnë” – shkroi ai në rrjetin X.
Sekuestrimi i parave dhe arit vjen pas një përplasjeje rreth dërgesave të energjisë. Hungaria dhe Sllovakia e kanë akuzuar Ukrainën se qëllimisht po i zvarrit punimet për riparimin e një naftësjellësi, pasi ishte goditur mësa duket nga një dron rus. Si kundërpërgjigje, Orbani i bllokoi me veto sanksionet e reja të BE-së ndaj Rusisë si dhe një hua prej 90 miliardë eurosh për Ukrainën./Nacionale
Hungary detained seven Ukrainians carrying about $82 million in cash and gold on suspicion of money laundering, as Kyiv accused Budapest of taking bank employees hostage https://t.co/aPcI4X4CG8 pic.twitter.com/7zKZNcrfGg
— Reuters (@Reuters) March 6, 2026
