Komisionerja e BE-së uron Kurtin për fitoren, Kos kërkon kompromis mes forcave politike në Kosovë: Tani duhet të bashkohen

Komisionerja e Bashkimit Evropian për Zgjerim, Marta Kos, ka uruar liderin e LVV Albin Kurti, për fitoren në zgjedhjet e fundit.

Në një postim në platformën “X”, ajo ka vlerësuar mbarëvajtjen e procesit zgjedhor, teksa i ka kërkuar forcave politike të gjejnë kompromis për të ndërtuar stabilitet institucional në Kosovë.

“Urime @albinkurti për fitoren e zgjedhjeve në Kosovë, dhe, më e rëndësishmja, për procesin e qetë, gjithëpërfshirës dhe të rregullt të votimit.

Që Kosova të përparojë në rrugën e saj drejt BE-së, forcat politike tani duhet të bashkohen dhe të gjejnë kompromise për të ndërtuar stabilitet institucional.

Pres me padurim të kthehem në Kosovë sa më shpejt të jetë e mundur për të përshpejtuar punën për integrimin e Kosovës në BE dhe për të vazhduar punën për financimin e Planit të Rritjes”, shkruan Kos.