Policët mund të mbajnë mjekër dhe tatuazhe të caktuara, MPB miraton rregulla të reja

Ministria e Punëve të Brendshme ka miratuar ndryshime në Rregulloren për sjelljen dhe marrëdhëniet e ndërsjella të punonjësve, duke u mundësuar policëve që nga tani të mbajnë mjekër të rregullt dhe lloje të caktuara tatuazhesh.

Ndryshimet janë bërë pas iniciativës së Sindikatës së Pavarur të Policisë, e cila kërkoi modernizimin e standardeve që lidhen me pamjen e punonjësve policorë. Rregullorja fillestare është miratuar më 4 maj, ndërsa plotësimet e reja kanë hyrë në fuqi më 1 qershor.

Sipas dispozitave të reja, policët me uniformë mund të mbajnë mjekër, me kusht që ajo të jetë e shkurtër, e rregullt dhe e mirëmbajtur. Gjithashtu, mjekra nuk duhet të pengojë përdorimin e pajisjeve zyrtare, përfshirë maskat mbrojtëse.

Ndryshime janë bërë edhe në lidhje me tatuazhet. Tashmë, tatuazhet do të lejohen në ekstremitetet e sipërme, ndërsa mbeten të ndaluara ato që përmbajnë mesazhe fyese, raciste ose vulgare, të cilat mund të dëmtojnë reputacionin e institucionit.

Sindikata e Pavarur e Policisë e ka përshëndetur vendimin, duke e cilësuar si një hap të rëndësishëm drejt harmonizimit të standardeve të policisë me praktikat moderne që zbatohen në shumë vende evropiane.

Përveç këtyre ndryshimeve, MPB ka pranuar edhe propozimin për lehtësimin e kufizimeve në përdorimin e telefonave mobilë për disa shërbime policore.

Nga Ministria theksojnë se rregullat e reja synojnë të krijojnë një ekuilibër mes nevojave moderne të punonjësve policorë dhe ruajtjes së profesionalizmit, disiplinës dhe reputacionit të shërbimit policor.