Andrea Pirlo pritet të jetë trajneri i ri i Italisë, ka nisur ta mbledhë stafin e tij
Andrea Pirlo pritet të bëhet trajneri i ri i kombëtares së Italisë, ndërsa ka nisur të marrë formë edhe stafi i tij teknik, ku përfshihen disa emra të njohur.
Sipas raportimeve të shumta, Pirlo e ka pranuar ofertën për të marrë drejtimin e “Azzurrëve”, pasi ishte zgjedhja e tretë e Federatës Italiane të Futbollit, pas refuzimeve nga Carlo Ancelotti dhe Pep Guardiola.
E vetmja pengesë që ka mbetur është zgjidhja e kontratës së tij aktuale me klubin nga Emiratet e Bashkuara Arabe, United FC.
Më pas, ai pritet të firmosë kontratën e re me Italinë, e cila do ta mbajë në detyrë deri në Kupën e Botës 2030.
Sipas ekspertit të merkatos të “Sky Sport Italia”, Gianluca Di Marzio, Pirlo tashmë ka nisur të ndërtojë stafin e tij për aventurën në kombëtare.
Ndihmëstrajner do të jetë Roberto Baronio, ish-mesfushori i Brescias, Fiorentinës, Lazios dhe Udineses, i cili aktualisht punon me Pirlon te United FC.
Baronio është pjesë e stafit të Pirlos që nga koha kur të dy punonin në akademinë e Juventusit, ndërsa më pas e ka ndjekur edhe te Karagumruk, Sampdoria dhe United FC.
Për Baronion kjo do të jetë një rikthim në kombëtaren italiane, pasi ai drejtoi ekipin U18 të Italisë në sezonin 2015/16, përpara se të promovohej te përfaqësuesja U19 një vit më vonë.
Ai ishte gjithashtu bashkëlojtar me Pirlon në kombëtaren italiane që fitoi Kampionatin Evropian U21 në vitin 2000.
Roberto De Bellis, i cili gjithashtu punon me ta te United FC, pritet të jetë trajneri i përgatitjes fizike.
Një emër i ri në staf mund të jetë Paolo Bertelli, i cili vetëm pak kohë më parë u emërua menaxher i performancës te Genoa dhe mund t’i mbajë të dyja detyrat njëkohësisht.
Ndërkohë, raportohet se Marco Savorani është kandidati kryesor për postin e trajnerit të portierëve.
Ky do të ishte një rikthim për të, pasi ai e mbajti këtë rol te kombëtarja e Italisë nën drejtimin e Luciano Spallettit nga viti 2023 deri në vitin 2025.
Së fundmi, Savorani ishte pjesë e stafit të Atalantës, ndërsa më herët ka punuar edhe te Roma, Tottenham Hotspur dhe Fiorentina.
