OKB liston 214 kompani të përfshira në aktivitetet e vendbanimeve izraelite në territoret palestineze

Të paktën 214 kompani janë identifikuar nga Kombet e Bashkuara si të përfshira në aktivitete që lidhen me ndërtimin e vendbanimeve izraelite në territoret palestineze të pushtuara, sipas përditësimit të fundit të një baze të dhënash të OKB-së, të publikuar të premten.

Shumica e kompanive të listuara kanë seli në Izrael, ndërsa në listë përfshihen edhe kompani ndërkombëtare, mes tyre tetë me seli në Shtetet e Bashkuara.

Baza e të dhënave, e publikuar nga Zyra e Komisionerit të Lartë të OKB-së për të Drejtat e Njeriut (OHCHR) në emër të Këshillit të të Drejtave të Njeriut, përfshin kompani nga disa vende.

Në të janë përfshirë kompani amerikane të sektorit të udhëtimeve, si Expedia dhe Airbnb, si dhe kompani nga Kina,

Izraeli kundërshton listën
Kompania gjermane e materialeve të ndërtimit Heidelberg Materials është gjithashtu pjesë e listës, e cila është krijuar në vitin 2020 dhe përditësohet periodikisht.

Izraeli e ka kundërshtuar ashpër bazën e të dhënave, duke pretenduar se ajo është krijuar për të “persekutuar shtetin hebre” dhe për të nxitur një fushatë kundër kompanive që, sipas Izraelit, nuk kanë kryer shkelje.

Ndërkohë, Gjykata Ndërkombëtare e Drejtësisë ka konstatuar se vendbanimet izraelite në territoret e pushtuara palestineze janë në kundërshtim me të drejtën ndërkombëtare.

Lista është zgjeruar
Ky është përditësimi i katërt i bazës së të dhënave. Një vit më parë, lista përmbante 158 kompani.

Sipas OHCHR-së, zyra ka marrë deri në vitin 2024 informacione për 596 kompani, ndërsa procesi i shqyrtimit të 255 prej tyre ende nuk ka përfunduar.

OHCHR vlerëson për secilën kompani nëse ajo është e përfshirë drejtpërdrejt në ndërtimin e vendbanimeve, në aktivitete në territoret e pushtuara së bashku me kompani ose aktorë të tjerë, apo nëse kontribuon përmes ofrimit të produkteve dhe shërbimeve.

Përfshirja në bazën e të dhënave nuk sjell automatikisht ndonjë masë apo pasojë specifike për kompanitë. Qëllimi i krijimit të saj, i miratuar në vitin 2016, ishte rritja e transparencës dhe nxitja e kompanive për të rishikuar aktivitetet e tyre në territoret e pushtuara.