ALTA Banka Manastir reagon pas zhvillimeve në Serbi: Jemi të pavarur dhe nën mbikëqyrjen e Bankës Kombëtare

Pas zhvillimeve në ALTA Bankën në Serbi, ka reaguar ALTA Banka AD Manastir, e cila siguron klientët se është likuide dhe vazhdon punën pa ndërprerje. Nga banka theksojnë se është entitet juridik i pavarur, nën mbikëqyrjen e Bankës Kombëtare, ndërsa të gjitha degët dhe bankomatet funksionojnë normalisht dhe klientët mund të disponojnë pa pengesa me depozitat e tyre.

Reagimi i plotë:

Në kontekstin e zhvillimeve të fundit që lidhen me ALTA Bankën në Republikën e Serbisë, ALTA Banka AD Manastir informon publikun se Banka është një entitet juridik i pavarur, i regjistruar në Republikën e Maqedonisë së Veriut, i cili vepron në përputhje me legjislacionin vendas dhe është nën mbikëqyrjen e drejtpërdrejtë të Bankës Kombëtare të Republikës së Maqedonisë së Veriut.

ALTA Banka AD Manastir është likuide dhe vazhdon me operacione të rregullta dhe të pandërprera. Të gjitha degët dhe bankomatet janë në funksion të zakonshëm, dhe klientët kanë qasje të papenguar në fondet e tyre. Klientët mund të disponojnë lirisht me depozitat e tyre, të tërheqin para të gatshme dhe të kryejnë të gjitha transaksionet bankare, në përputhje me kushtet e zakonshme të punës.

Ngjarjet që lidhen me bankën në Serbi nuk nënkuptojnë automatikisht një ndryshim në gjendjen financiare ose statusin ligjor të ALTA Banka AD Manastir.

Për më tepër, theksojmë se rrethanat në Republikën e Maqedonisë së Veriut janë thelbësisht të ndryshme nga ato në Serbi. ALTA Banka AD Manastir nuk i nënshtrohet presioneve politike dhe llogaritjeve të natyrës së atyre që shënuan ngjarjet në Serbi. Banka vepron në bazë të parimeve profesionale, të biznesit dhe rregullatore.

Banka ka kapitalin, asetet dhe detyrimet e veta, dhe operacionet e saj janë nën mbikëqyrjen e vazhdueshme të Bankës Kombëtare.

Depozitat e individëve sigurohen nëpërmjet Fondit të Sigurimit të Depozitave, në përputhje me kërkesat dhe limitet ligjore.

Ne i sigurojmë klientët tanë se Banka vazhdon të operojë rregullisht dhe të përmbushë detyrimet e saj. Fondet e tyre janë në dispozicion të tyre dhe nuk ka kufizime në përdorimin e shërbimeve bankare jashtë kushteve normale të operimit.

ALTA Banka mbetet e përkushtuar ndaj mbrojtjes së interesave të klientëve të saj, stabilitetit financiar dhe ruajtjes së besimit.