Bullgaria shkon në balotazh: Jotova dhe Gurov në garë të ngushtë, pjesëmarrje rekord e ulët

Bullgaria do të shkojë në raundin e dytë të zgjedhjeve presidenciale, ku pritet të përballen Ilijana Jotova dhe Andrej Gurov, sipas exit-polleve të para pas mbylljes së vendvotimeve.

Sipas agjencive të sondazheve, Jotova kryeson me 32,2–36,6% të votave, ndërsa Gurov renditet i dyti me 31,6–32,4%. Në vendin e tretë është Kostadin Kostadinov, me 12,6–15,7% të mbështetjes.

Zgjedhjet u karakterizuan nga pjesëmarrje shumë e ulët. Deri në orën 16:00 kishin votuar vetëm 16,04% e zgjedhësve, krahasuar me 24,12% në të njëjtën periudhë të zgjedhjeve presidenciale të vitit 2021.

Gjatë ditës janë raportuar 50 parregullsi dhe 23 makina votimi kanë dalë jashtë funksionit për shkak të problemeve teknike. Në vendvotimet e prekura, votimi ka vazhduar me fletëvotime në letër.

Rezultatet përfundimtare dhe pjesëmarrja zyrtare pritet të konfirmohen nga Komisioni Qendror i Zgjedhjeve.