Drejtoria e Doganave: Pronari i një argjendarie tentoi të kontrabandojë stoli ari me vlerë prej 4 milionë denarë përmes pikës kufitare të Bogorodicës

Stoli ari me vlerë 4 milionë denarë, të cilat një banor i Tetovës, pronar i një argjendarie, tentoi t’i kontrabandonte të fshehura në një jastëk qafe, janë sekuestruar nga zyrtarët doganorë në pikën kufitare të Bogorodicës. Kundër personit në fjalë është ngritur kallëzim penal për veprën penale të „kontrabandës”, e dënueshme sipas Kodit Penal.
Vepra penale është zbuluar gjatë kontrollit të një autobusi që qarkullonte në linjën Stamboll–Gostivar. Kur u pyetën nëse kishin diçka për të deklaruar, asnjë nga udhëtarët nuk deklaroi mallra për kontroll doganor, pas së cilës u krye një kontroll i detajuar. Gjatë kontrollit, brenda jastëkut për qafë që mbante i dyshuari, u zbuluan 77 copë stoli ari me peshë prej 612 gramë.
Gjatë procedurës paraprake hetimore, Sektori i Hetimeve ka siguruar prova se personi, pasi kishte blerë stolitë e arit në një punishte argjendarie në Stamboll, kishte për qëllim t’i transportonte ato ilegalisht në vend dhe t’i shiste në argjendarinë e tij.
Drejtoria e Doganave vazhdon aktivitetet e saj që synojnë mbrojtjen e interesave financiare të shtetit dhe krijimin e kushteve për një ekonomi të drejtë dhe konkurrencë të ndershme.