Mickoski: PSP-ja ishte implant antikushtetues, nuk mund të sjellin drejtësi me padrejtësi

Kryetari i Qeverisë, Hristijan Mickoski, në emisionin „Klik Plus“ në TV21, deklaroi se formimi i Prokurorisë Speciale Publike paraqiste goditje serioze ndaj drejtësisë, duke theksuar se që në fillim ishte themeluar mbi baza antikushtetuese. Në vend që të sillnin drejtësi, siç tha ai, bënin estradë.

„Ndjenja te qytetarët buron, kushtimisht thënë, nga disa gjëra që ndodhën në të kaluarën dhe që mendoj se i dhanë një goditje të fortë drejtësisë në Maqedoni. E para është periudha 1994-1998, kur VMRO-DPMNE ishte opozitë jashtëparlamentare dhe kur gjyqtarët zgjidheshin në Kuvend. Kur praktikisht pushteti i atëhershëm, i cili kishte fuqi aklamative, zgjodhi qindra gjyqtarë, një pjesë e të cilëve janë ende gjyqtarë aktivë. Dhe kjo ishte një strukturë e ngjyrosur politikisht.

Goditja e dytë ndaj drejtësisë është kur u soll ai implant, PSP-ja. Implant krejtësisht antikushtetues, kur nga ata që duhej të sillnin drejtësinë, nuk pamë asgjë më shumë se estradë. Atëherë bëheshin stema, shtypeshin bluza, mbaheshin kapele, bluza sportive me mbishkrimin PSP. Nuk mund të sjellësh drejtësi me padrejtësi. Që nga fillimi, ai implant është i paligjshëm, antikushtetues. Nuk mund të veproni në atë mënyrë. Për atë implant janë fajtore të gjitha partitë, sepse u miratua me konsensus. Tani nuk dua ta përjashtoj VMRO-DPMNE-në nga përgjegjësia. Unë nuk e përjashtoj VMRO-DPMNE-në. Por ai implant krijoi një perceptim të tillë, edhe më të fuqishëm, kur ndodhi problemi i tretë. Dhe ky është momenti kur gjithçka përfundoi në një valixhe me para. Të gjitha këto janë procese që te qytetarët krijuan ndjenjën e mosbesimit ndaj drejtësisë“, theksoi Mickoski.