Zelensky: Rusia lëshoi rreth 2,300 dronë sulmues ndaj Ukrainës brenda një jave

Presidenti ukrainas, Volodymyr Zelensky, ka bërë të ditur se Rusia ka lëshuar rreth 1,600 bomba ajrore të drejtuara, 48 raketa dhe afro 2,300 dronë sulmues ndaj Ukrainës gjatë javës së fundit.

Sulmet ruse ndaj rajonit të Dnipros, në lindje të Ukrainës, gjatë natës së së shtunës, kanë lënë të vdekur katër persona dhe kanë plagosur 22 të tjerë.

Ndërkohë, një sulm tjetër në Vinnytsia, në pjesën perëndimore-qendrore të vendit, ka shkaktuar plagosjen e gjashtë personave të tjerë, shkruan Euronews.

Oleksandr Hanzha, kreu i Administratës Ushtarake të Rajonit të Dnipropetrovskut, ka deklaruar se forcat ruse e kanë goditur zonën e Dnipros me dronë dhe bomba ajrore, duke sulmuar më shumë se 20 herë tri zona të ndryshme.

Sipas tij, sulmet kanë dëmtuar infrastrukturën në qytetin e Dnipros, ndërsa në distriktin e Synelnykovskyt janë shkatërruar shtëpi private, ndërtesa banimi, dyqane dhe automjete. Dëme në një shtëpi private janë raportuar edhe në distriktin e Nikopolit.

Në një reagim në rrjetet sociale, presidenti ukrainas Volodymyr Zelensky ka bërë të ditur se një dron rus ka goditur gjithashtu një ndërtesë të lartë banimi në Vinnytsia, ndërsa në qytetin e Kharkivit, në verilindje të Ukrainës, është shënjestruar një hipermarket.

“Në Kharkiv, rusët fillimisht goditën një hipermarket me materiale për përmirësimin e shtëpive dhe më pas kryen një sulm të dytë, cinik, ndaj ekipeve të emergjencës që mbërritën në vendngjarje”, ka shkruar Zelensky.

Ai ka shtuar se nga ky sulm janë plagosur edhe disa pjesëtarë të shërbimeve të emergjencës, pa bërë të ditur numrin e saktë të tyre.