El Salvadori shkatërron selinë e bandës 400 Mawozo në Haiti (VIDEO)

Presidenti i El Salvadorit, Nayib Bukele, ka njoftuar se ushtria salvadoriane ka shkatërruar selinë e bandës kriminale 400 Mawozo, gjatë një operacioni ushtarak në periferi të kryeqytetit të Haitit, Port-au-Prince.

Sulmi u zhvillua me trupa tokësore dhe mbështetje ajrore në një kompleks në zonën e Croix-des-Bouquets, që konsiderohet si një nga bastionet kryesore të bandës. Sipas Bukeles, gjatë operacionit u shkatërrua edhe banesa e kreut të organizatës, Wilson “Lanmò San Jou” Joseph.

Në një reagim në rrjetin social X, presidenti salvadorian deklaroi se shumica e anëtarëve të bandës u larguan nga kompleksi pa tentuar të përballeshin me forcat ushtarake.

Pamjet e publikuara tregojnë disa helikopterë që qëllojnë drejt kompleksit, ndërsa dhjetëra persona shihen duke u larguar nga zona. Megjithatë, BBC thekson se nuk ka mundur të verifikojë në mënyrë të pavarur pamjet dhe as nëse objekti ishte vërtet selia e organizatës kriminale.

Disa media kanë raportuar për deri në 20 viktima nga sulmi, por ky bilanc nuk është konfirmuar nga autoritetet. Po ashtu, mbetet e paqartë shkalla e dëmeve në kompleks. Sipas Miami Herald, lideri i bandës nuk ndodhej në objekt në momentin e operacionit.

Ky është operacioni i parë ushtarak i El Salvadorit kundër një objektivi në Haiti që prej dislokimit të më shumë se 2 mijë ushtarëve salvadorianë në vend muajin e kaluar. Fillimisht, trupat u dërguan për të ndihmuar në gjetjen dhe shpëtimin e katër teknikëve të Forcave Ajrore të El Salvadorit, të cilët u rrëmbyen me armë në tetor.

Katër personat ishin pjesë e misionit ndërkombëtar kundër bandave në Haiti, i njohur si Forca e Shuarjes së Bandave (GSF).