Numri i të vdekurve shkon në 10, rreth 40 të lënduar – detaje dhe pamje nga vendi i një aksidenti masiv në një autostradë të Turqisë (VIDEO)

Numri i të vdekurve shkon në 10, rreth 40 të lënduar – detaje dhe pamje nga vendi i një aksidenti masiv në një autostradë të Turqisë (VIDEO)

Dhjetë persona kanë vdekur dhe 40 të tjerë janë lënduar në një aksident masiv në Mersin, Turqinë jugore, ku thuhet se ishin të përfshira të paktën katër automjete.

Sipas mediave të huaja, përcjell Telegrafi, aksidenti ka ndodhur në autostradën Tarsus-Adana-Gaziantep (TAG) të dielën.

Siç thuhet më tej, një autobus pasagjerësh kaloi në korsinë e kundërt dhe goditi dy makina dhe një kamion.

Pas njoftimit, në zonë janë dërguar një numër i madh i ekipeve të Urgjencës Shëndetësore, policisë dhe zjarrfikësve.

Ministri i Shëndetësisë, Fahrettin Koca postoi edhe një përditësim në lidhje me aksidentin në llogarinë e tij në rrjetet sociale X: “10 persona humbën jetën dhe 40 persona u lënduan, 9 prej tyre rëndë, në një aksident zinxhiror me një autobus pasagjerësh në autostradën Mersin-Adana. Trajtimi i të plagosurve po vazhdon në spitalet tona,… I shpreh ngushëllimet e mia familjarëve të atyre që humbën jetën dhe u uroj shërim të shpejtë të lënduarve”.