Edi Rama niset drejt Washingonit, do marrë pjesë në Samitin për 75-vjetorin e NATO-s

Publikuar 12:11 8 Korrik, 2024

Kryeministri i Shqipërisë, Edi Rama, është nisur drejt Washingtonit për të marrë pjesë në Samitin e NATO-s në një takim të nivelit të lartë që mbahet prej datës 9 deri më 11 korrik.

Samiti do të zhvillohet për 75 vjetorin e NATO-s me ftesë të presidentit amerikan, Joe Biden.

Ndërsa feston 75 vjetorin e themelimit të saj, gjatë takimit që fillon të martën, NATO, e përbërë nga 32 vende evropiane dhe të Amerikës së Veriut, janë të angazhuar për të mbrojtur njëri-tjetrin nga sulmet e armatosura, ku në Samit do të theksohet forca përmes solidaritetit.

Shtatëdhjetë e pesë vjet më parë, 12 vende nënshkruan Traktatin e Atlantikut të Veriut në Uashington, DC për të siguruar mbrojtjen e tyre kolektive në një botë të paparashikueshme.

Këtë vit, 32 aleatë të NATO-s do të takohen përsëri në Washington për të marrë vendime kyçe se si të vazhdojnë të mbrojnë një miliard qytetarët e tyre, ndërsa bota përballet me momentin më të rrezikshëm të sigurisë që nga Lufta e Ftohtë.

“Në Samitin e Washingtonit, ne do të demonstrojmë edhe një herë unitetin dhe forcën e NATO-s, në mbështetje të Ukrainës dhe për të mbajtur të gjithë njerëzit dhe vlerat tona të sigurta”, ka thënë Jens Stoltenberg, Sekretar i Përgjithshëm i NATO-s.

Në Samitin e Washingtonit, udhëheqësit e NATO-s do të trajtojnë një sërë çështjesh me të cilat përballet Aleanca dhe do të sigurojnë që NATO të mbetet e gatshme për t’iu përgjigjur çdo sfide.

Këtu përfshihet mbrojtja e të gjithë aleatëve, me stërvitje në tokë, në det dhe në ajër; ndihma për Ukrainën, e cila është ende nën pushtimin brutal të Rusisë; bashkëpunimi mes partnerëve, që përfshin Evropën, rajonin Indo-Paqësor dhe organizata të tjera, veçanërisht BE.

Paralelisht me Samitin e Washingtonit, qyteti do të presë Forumin Publik të NATO-s – një ngjarje që synon të promovojë një kuptim më të mirë publik të politikave, qëllimeve dhe vendimeve të NATO-s përmes dialogut dhe angazhimit me një grup unik dhe të larmishëm të palëve të interesuara.