Arbitrin e droguan dhe e grabitën në një hotel/ U tha se ai humbi ndeshjen për “një problem shëndetësor”

Rosario Cárdenas u emërua arbitri i katërt në Monterrey-Tigres (4-1) fundjavën e kaluar, në ligën meksikane, por ai nuk u paraqit në ndeshje, pasi sipas komisionit të arbitrave, kishte një problem shëndetësor.

Por një ish-gjyqtar tha për shtypin vendas se nuk ishte aspak kështu: arbitri mori një shoqërues në dhomën e hotelit, ku ishte mbledhur ekipi i arbitrave një ditë para ndeshjes dhe atje u drogua.

“Ky djalë nuk ka shkuar për pije, por ka marrë një shoqërues në hotel dhe atje me sa duket e kanë droguar. E kanë lënë pa ndjenja dhe i kanë vjedhur portofolin, celularin dhe paratë”, ka thënë ish-arbitri, Francisco Chacón, cituar nga ‘Record Mexico’.

“Meqenëse ai nuk u shfaq të nesërmen për ndeshje, ata shkuan në dhomën e tij dhe panë që ai ishte në një gjendje të papërshtatshme, ai nuk ishte në gjendje të asistonte në një ndeshje të Kategorisë së Parë. Kjo është arsyeja pse ata duhej të bënin ndryshimin”, shtoi Francisco Chacón.

Me sa duket, ky nuk ishte rasti i parë i këtij lloji në Monterrey. “Komiteti i arbitrazhit donte ta mbyllte këtë çështje, siç bëri në të kaluarën me z. Terrazas.

Është një arbitër i quajtur Terrazas, të cilit i ndodhi diçka e ngjashme në të njëjtin qytet. Ai shkoi të pinte disa pije dhe nuk u zgjua të nesërmen për të gjykuar një ndeshje të U-23”, shtoi ish-arbitri.