Mickoski pas takimit me Orbanin: Maqedonia me mbështetje për Ukrainën dhe paqen, interes i madh për kredinë hungareze, rritja e pashmangshme

Së pari, dua të falënderoj për mikpritjen e ngrohtë dhe pritjen që patëm në nivelin më të lartë këtu në Budapest, gjë që vetëm konfirmon nivelin e lartë të marrëdhënieve që ekzistojnë midis dy shteteve tona.

Siç ishit dëshmitarë edhe ju sot, këtu u mbajt samiti qeveritar maqedono-hungarez, ose mbledhja e dytë ndërqeveritare, pas asaj në Ohër.

Shumicën e çështjeve që u diskutuan sot në nivel bilateral, miku im i dashur, kryeministri i nderuar i Hungarisë, i tha. Qëllimi ynë strategjik si shtet ka qenë, është dhe do të mbetet të bëhemi pjesë e familjes evropiane, diçka që e kemi merituar prej shumë kohësh, këtu nuk duhet të ketë asnjë dilemë.

Por, gjithashtu duhet të theksojmë atë që qytetarët maqedonas kanë dhënë për realizimin e këtij qëllimi strategjik, i cili, për fat të keq, nuk është lëvizur nga gjendja ku ishte 20 vjet më parë, është me të vërtetë e paçmueshme, gjegjësisht kostoja është aq e madhe saqë nuk mund të përcaktohet. Sepse, para së gjithash, flasim për bilaterizimin e procesit të negociatave dhe jo për evropianizimin e tyre.

Shpresoj që më në fund ky proces për ne të zhbllokohet, me mbështetje të madhe nga Hungaria mike dhe që ne si shtet të fillojmë negociatat, unë jam i bindur se, nëse kemi mundësi t’i fillojmë ato negociata bazuar në kriteret e vërteta të Kopenhagës, do t’i përfundojmë me sukses dhe do të bëhemi pjesë e BE-së.

Gjithashtu, diskutuam edhe për mbështetjen e përgjithshme që marrim nga Qeveria hungareze si Qeveri maqedonase. E dini se në fillim kishte edhe mbështetje financiare nga Hungaria, mjete që përdoren për ndërtimin e rrugëve, bulevardeve, shkollave, kopshteve, në mënyrë që të modernizojmë shtetin tonë.

Ajo që gjithashtu është shumë e rëndësishme për ta përmendur është se në seancën ndërqeveritare të sotme u fol për një bashkëpunim edhe më të thellë ndërshtetëror në fushën e infrastrukturës, por poashtu, ministrat mes tyre e veçanërisht ministrat e punëve të brendshme dhe ai i mbrojtjes, diskutuan për një bashkëpunim të mundshëm ushtarak në të ardhmen, përkatësisht për zhvillimin e mëtejshëm të industrive ushtarake të të dy vendeve dhe pse jo, rrjetëzim dhe hyrje të përbashkët në tregje të treta.

Kryeministri Orban ka treguar dhe dëshmuar shumë herë në të kaluarën se është njeri me integritet dhe qëndrime të qarta dhe fjala e tij ka peshë të madhe, për çka gëzon respektin tim të pafund si një njeri që me sjelljen e tij shpesh di të frymëzojë. E përgëzoj për rezultatet e tij në fushën e ekonomisë, investimeve dhe realizimit të investimeve kapitale këtu në Hungari.

Ai e ka udhëhequr Hungarinë, e udhëheq dhe do ta udhëheqë për një kohë të gjatë, me shumë stabilitet dhe përkushtim, përmes ujërave shumë të trazuara dhe të pasigurta, gjithmonë duke luftuar për interesat e popullit dhe shtetit të tij.

Vetëm do të rikujtoj qëndrimin e tij të qëndrueshëm dhe të fuqishëm në mbrojtjen e kufijve evropianë nga emigrantët ilegalë. Çështje në të cilën kemi bashkëpunuar dhe për të cilën Orban tashmë foli.

Së bashku ta nxisim dhe ta mbështesim Evropën për të marrë rol më intensiv në procesin e arritjes së një paqeje të qëndrueshme dhe të përhershme në Ukrainë, përmes partneritetit dhe aleancës me SHBA-në, diçka që është në dobi si të miqve tanë ukrainas, ashtu edhe të vetë Evropës.

Si vend, jemi të përqendruar në përmbushjen e detyrimit tonë për të punuar për prosperitetin dhe jetën e qytetarëve tanë dhe për të siguruar një të ardhme.

Kemi edhe rezultate, sot është publikuar rritja e BPV-së për tremujorin e katërt, e cila është 3.2 për qind dhe pas asaj në tremujorin e tretë, që ishte 3 për qind, e bën që rritja vjetore e BPV-së të jetë 2.8 për qind edhe pse disa na parashikonin rritje shumë më të ulët, nën 2 për qind. Është mirë që në kontekst pozitiv do të kemi persona të zhgënjyer, të cilët nuk ia duan të mirën atdheut të tyre.

Por ky është një motivim shtesë për ne që, së bashku me popujt vëllazërorë dhe miqtë tanë, të punojmë bashkë në fushën e ekonomisë dhe për përmirësimin e jetës së qytetarëve tanë.

Për në fund, dua të theksoj se qëllimi ynë është i qartë – një Maqedoni e fortë, e qëndrueshme dhe e begatë në Bashkimin Evropian, me përparim ekonomik dhe standarde të larta për qytetarët tanë. Mbështetja nga vendet mike si Hungaria është e rëndësishme në këtë proces, por më e rëndësishmja është mbështetja nga popujt tanë në këto dy vende vëllazërore, të cilët meritojnë një të ardhme më të mirë dhe më të begatë.