“Të qëndrosh i heshtur përballë masakrave në Gaza do të thotë të jesh bashkëpunëtor në krim”, deklaron Erdogan

Së fundmi, presidenti turk Recep Tayyip Erdogan ka kërkuar ta pozicionojë vendin e tij si një pikë stabiliteti në një botë gjithnjë e më të trazuar, duke thënë se Turqia është thelbësore për sigurinë evropiane.

Erdogan tha gjithashtu se Turqia është në gjendje të shtrijë ndarjet gjeopolitike mbi Ukrainën, Sirinë dhe valën e fundit të tarifave amerikane që kanë ndezur një luftë tregtare globale.

Bëhet e ditur se Erdogan këto komente i dha në Forumin vjetor të Diplomacisë në Antalia.

Një pjesë e konsiderueshme e fjalimit të tij u fokusua në konfliktin izraelito-palestinez, shkruan AA.

“Vitet e fundit, Izraeli ka kryer hapur gjenocid kundër popullit palestinez, duke shpërfillur të drejtat themelore të njeriut dhe duke shkelur ligjin ndërkombëtar”, tha Erdogan.

Ai e përshkroi Izraelin si një “shtet terrorist” dhe denoncoi heshtjen e komunitetit ndërkombëtar.

“Të qëndrosh i heshtur përballë masakrave të Izraelit do të thotë të jesh bashkëpunëtor në këtë krim”, tha ai.

Ai i kërkoi komunitetit ndërkombëtar, veçanërisht Këshillit të Sigurimit të OKB-së, të ndërmarrë veprime dhe t’i japë fund gjakderdhjes, duke u bërë thirrje atyre që “të qëndrojnë me popullin palestinez”.

“Edhe nëse është në luftë, a vepron kështu një shtet legjitim? A nuk quhet ky terrorizëm shtetëror? Prandaj Izraeli është një shtet terrorist”, përfundoi Erdogan.