Trumpi për sulmet ruse në Kiev: “Vladimir, NDALU!”
Presidenti i Shteteve të Bashkuara, Donald Trump, e kritikoi të enjten homologun rus, Vladimir Putin, pasi Rusia e sulmoi Kievin e Ukrainës me raketa e dronë gjatë natës, duke i thënë, “Vladimir, NDALU!”
“Unë nuk jam i lumtur me sulmet ruse ndaj Kievit. Jo të nevojshme dhe kohë shumë e keqe” – shkroi presidenti amerikan në rrjete sociale një ditë pasi tha se homologu ukrainas, Volodymyr Zelensky, po i pengon bisedimet e paqes rreth përfundimit të luftës, raporton agjencia e lajmeve “Reuters”.
Kremlini nuk iu përgjigj menjëherë një kërkese për koment.
Kur u pyet për sulmet ruse në Kiev në një konferencë më herët të enjten, zëdhënësi i Kremlinit, Dmitry Peskov, tha se Rusia po vazhdonte të godiste “caqe ushtarake dhe ato që janë ngjitur me caqet ushtarake”.
Kritika e rrallë e Trumpit ndaj Putinit erdhi pas kritikës së tij ndaj Zelenskyt të mërkurën, pasi ky i fundit tha se Ukraina nuk do ta njohë pushtimin rus të Krimesë.
“Kjo deklaratë është shumë e dëmshme për bisedimet e paqes me Rusinë” – shkroi Trumpi në rrjete sociale.
Trumpi, i cili u përplas verbalisht dhe publikisht me Zelenskyn në Zyrën Ovale para disa javëve, tha se Krimea është humbur vite më parë dhe “madje nuk është pikë diskutimi”.
