Shkupjani dënohet me një vit burg me kusht pasi ka sharë dhe ka nxitur urrejtje ndaj komunitetit LGBTI në facebook

Duke vepruar mbi propozimin akuzues të parashtruar nga Prokuroria Themelore Publike Shkup, Gjykata Themelore Penale Shkup solli aktgjykim me të cilin dënoi një person për vepër penale – Përhapje e materialit racist dhe ksenofobik përmes sistemit kompjuterik nga neni 394-g paragrafi 1 i Kodit Penal.

Aktgjykimi është shqiptuar në një seancë të vetme mbi bazën e pranimit të fajësisë nga ana e të akuzuarit, i cili pranoi se vepra për të cilën akuzohej është kryer në kohën, vendin dhe mënyrën e përshkruar në aktakuzën e parashtruar.

Në bazë të kësaj, Gjykata e konstatoi si të pakontestueshme gjendjen faktike se i dënuari më 26.02.2022, përmes sistemit kompjuterik kishte përhapur publikisht përfaqësime të ideve që nxisin urrejtje kundër një grupi të margjinalizuar.

Nga profili i tij në rrjetin social, shkupjani 30-vjeçar kishte komentuar në postime të një portali informativ që kishin të bënin me organizimin e të ashtuquajturës Paradë e Krenarisë në Shkup. Në komentet e tij kishte bërë thirrje për dhunë dhe kishte nxitur urrejtje ndaj pjesëtarëve të komunitetit LGBTI si anëtarë të një grupi të margjinalizuar mbi baza të orientimit seksual.

Për veprën e kryer, Gjykata e shpalli fajtor dhe i shqiptoi dënim me burg prej 1 viti, i cili nuk do të ekzekutohet nëse brenda një viti nga hyrja në fuqi e aktgjykimit i dënuari nuk kryen vepër të re penale. Aktgjykimi XVII K-913/24 i Gjykatës Themelore Penale Shkup është i formës së prerë dhe i ekzekutueshëm.

Prokuroria Themelore Publike Shkup, duke pasur parasysh standardet evropiane për mbrojtje nga urrejtja dhe diskriminimi, ndjek në mënyrë aktive procedimin e këtyre lëndëve, për çka është caktuar një prokuror publik i veçantë.