Stuhi e fuqishme dimërore godet Afrikën e Jugut – pamje të rralla në këtë stinë (VIDEO)

Një front i ftohtë i ashpër ka përfshirë Afrikën e Jugut që nga fundjava, duke sjellë reshje të dendura dëbore, ulje të temperaturave dhe ndërprerje të shërbimeve.

Provincat si Eastern Cape, KwaZulu-Natal dhe Free State kanë raportuar reshje dëbore të konsiderueshme, duke çuar në mbylljen e disa rrugëve kryesore, përfshirë segmente të autostradës N2.

Këto kushte të rrezikshme shkaktuan një aksident rrugor fatal përgjatë autostradës N2, ku pesë persona humbën jetën, sipas departamentit të transportit të Eastern Cape, raporton reuters.

Shërbimi Meteorologjik i Afrikës së Jugut kishte lëshuar paralajmërime për një rënie të madhe të temperaturave, shoqëruar me shi të dendur, erëra të forta dhe reshje dëbore në zonat lindore.

Përveç ndërprerjeve të trafikut, moti ekstrem ka shkaktuar ndërprerje të energjisë elektrike në të gjithë vendin, me shërbimin publik Eskom që po përballet me një numër të lartë thirrjesh nga qytetarët dhe po punon për rikthimin e furnizimit me energji.

Ky front i ftohtë pritet të vazhdojë deri në mesjavë. Autoritetet i bëjnë thirrje qytetarëve të qëndrojnë të sigurt dhe të shmangin udhëtimet e panevojshme gjatë kushteve të motit të keq.