Vazhdojnë të jenë aktive shumë vatra zjarri

Zjarret ende po gllabërojnë pyjet. Janë regjistruar 15, nga të cilat 9 janë aktive dhe 6 janë nën kontroll. Zjarri më i rëndë është zjarri në malin Goten midis komunave Radovish, Vasilevë dhe Berovë. Digjen edhe pyjet në territorin e komunës së Prilepit, Kavadarit, Makedonski Brodit, Komunës së Zhelinës, Kriva Pallankës, Makedonska Kamenicës, Ilindenit si dhe Komunës së Çashkës. Stojançe Angelov, tha se ka dyshime të arsyeshme se shumë nga zjarret janë shkaktuar dhe disa ishin ndezur nga pakujdesia.

” Ne kemi një numër të madh vilash ose shtëpi gjysmë të braktisura të vjetra që janë shndërruar në vila, dhe për të cilat unë kam bërë thirrje në mënyrë të përsëritur për të pastruar oborret mundësisht nga jashtë, për të bërë një rrip prej toke të lëvruar në të cilin nuk ka bimësi. Është njohuri e zakonshme që zjarri nuk digjet në dhe, zjarri djeg bimësinë kështu që mund të vijë në derën e përparme ose në trarët e strukturës së çatisë dhe të zërë çdo shtëpi ose vilë”, tha Stojançe Angelov – Drejtor i Drejtorisë për Mbrojtje dhe Shpëtim.

LSDM opozitare akuzoi VMRO- DPMNE-në për dështim në ballafaqimin me situatën.

“Statistikat tregojnë të dhëna dramatike, alarmante. Vitin e kaluar, 95,181 hektarë u dogjën në Maqedoni. Madje 8 herë më shumë se mesatarja e 17 viteve të fundit. Më e frikshme nga të gjitha është se numri i zonave të djegura në Maqedoni në vitin 2024 – 95,181 – është shumë më i lartë se shifrat në Spanjë, Itali, Francë, të cilat sipas zonës janë më të mëdha se atdheu ynë”, tha Jovica Jankoviq – LSDM.

Ndërkohë kryeministri Hristijan Mickoski thotë se deri më tani situata me zjarret është përballuar mirë.

“ Deri më tani, mund të them se në korrik e kemi plotësisht nën kontroll situatën, të gjithë avionët janë në funksion. Drejtoria për Mbrojtje dhe Shpëtim, ushtria dhe policia, automjetet janë në funksion, automjete speciale që ne përgatitëm sepse e dinim se çfarë na pret këtë verë, ne aktivizuam mekanizmin evropian, mendoj disa ditë më parë, por kini parasysh se kjo situatë është kudo në Evropë”, tha Hristijan Mickoski – Kryeministër.

Gjatë 24 orëve të fundit, në vend janë regjistruar gjithsej 51 zjarre. Autoritetet njoftuan se përmes Mekanizmit të Mbrojtjes Civile të Bashkimit Evropian, Sllovenia dhe Franca kanë ofruar ndihmë për një ekip prej rreth 100 zjarrfikësish.