Tërmeti 8.8 ballë godet gadishullin e Kamchatka në Rusi, shkakton cunami

Një tërmet i fuqishëm me magnitudë 8.8 goditi verilindjen e Rusisë të mërkurën në mëngjes, duke shkaktuar paralajmërime për cunami në Alaskë, Hawaii, Japoni dhe rajone të tjera përreth Oqeanit Paqësor.

Epiqendra e tërmetit ishte në Gadishullin Kamçatka, ku u raportuan dëme materiale dhe u ndërmorën masa evakuimi.

Ministri rajonal për situatat e emergjencës, Sergei Lebedev, njoftoi se në disa pjesë të rajonit u shënuan valë cunami deri në 4 metra.

Qendra e Paralajmërimit për Cunami në Paqësor bëri të ditur se valë nga 1 deri në 3 metra mbi nivelin e baticës mund të prekin zona bregdetare të Havait, Kilit, Japonisë dhe Ishujve Solomon.

Ndërkohë, në disa pjesë të bregdetit të Rusisë dhe Ekuadorit, mund të shfaqen valë mbi 3 metra.

Agjencia Meteorologjike e Japonisë lëshoi një paralajmërim për cunami përgjatë bregut të Paqësorit, duke theksuar se valë deri në 3 metra mund të arrijnë pjesën veriore të vendit.

“Duhet të merren masa urgjente për të garantuar sigurinë e jetës dhe pronës,” thuhej në njoftim. Valët e para priteshin rreth orës 19:00 të së martës, sipas orës lokale.

Ndërkohë, Qendra Kombëtare e Paralajmërimit për Cunami me seli në Alaskë lëshoi një paralajmërim për pjesë të Ishujve Aleutianë.

Po ashtu, nën kujdes u vendosën edhe pjesë të Bregut Perëndimor të SHBA-së, përfshirë Kaliforninë, Oregonin, Uashingtonin dhe shtetin e Hawaiit.

Në fillim të korrikut, pesë tërmete të forta u regjistruan pranë Kamçatkës, më i fuqishmi me magnitudë 7.4.

Ai ishte 20 kilometra i thellë dhe ndodhi 144 kilometra në lindje të qytetit Petropavlovsk-Kamçatsk, me një popullsi prej rreth 180,000 banorësh.

Kamçatka është një zonë e njohur për aktivitet të lartë sizmik. Më 4 nëntor 1952, një tërmet me magnitudë 9.0 goditi rajonin, duke shkaktuar valë cunami deri në 9.1 metra në Hawaii, ku pati dëme, por jo viktima.