Morri 10 mijë euro për të ndikuar te një gjykatës arrestohet një person, prokuroria kërkon paraburgim

Një prokuror nga Prokuroria Themelore Publike për Ndjekjen e Krimit të Organizuar dhe Korrupsionit ka nxjerrë urdhër për zhvillimin e procedurës hetimore ndaj një personi, i dyshuar për veprën penale – marrje shpërblimi për ndikim të paligjshëm.

Sipas hetimit, në periudhën nga prilli deri në gusht të këtij viti, i dyshuari ka marrë 10.000 euro për të shfrytëzuar ndikimin e tij të supozuar dhe për të ndërhyrë që të kryhet një veprim zyrtar që nuk duhej të kryhej – pra, kinse për të ndikuar në vendime në procedura gjyqësore civile para Gjykatës Themelore Civile Shkup dhe Gjykatës së Apelit Shkup.

Dyshime për ryshfet ndaj gjyqtarëve
Rasti ka nisur kur një administrator i një personi juridik, i cili ishte në një kontest gjyqësor, kishte marrë informacione se pala tjetër ushtronte ndikim serioz mbi gjyqtarët përmes ryshfetit. Për ta verifikuar informacionin, përmes një gjyqtari të pensionuar ai kishte marrë kontaktin e të dyshuarit, i cili iu paraqit si “person i afërt me gjyqtarë të Gjykatës së Apelit Shkup”.

Në takimin e parë, i dyshuari i kishte kërkuar drejtpërdrejt 16.000 euro për ta përfunduar procesin gjyqësor në favor të kompanisë së denoncuesit. Për më tepër, ai e kishte bindur se pala tjetër ofronte shuma edhe më të mëdha, por gjyqtarët nuk pranonin të merrnin vendim pa bazë ligjore.

Pagesa me këste dhe arrestimi në vendngjarje
Për shkak se nuk kishte mundësi të siguronte gjithë shumën, denoncuesi me të dyshuarin ishte marrë vesh që pagesa të bëhej në tri këste. Më 30 prill i kishte dorëzuar 5.000 euro, pas së cilës i dyshuari e kishte siguruar se rezultati i çështjes ishte i garantuar. Në periudhën e mëvonshme, ata kishin mbajtur komunikim të vazhdueshëm.

Megjithatë, më vonë denoncuesi e kishte raportuar tregtinë me ndikim, dhe gjatë pagesës së radhës prej 5.000 euro, i dyshuari ishte kapur në vendngjarje dhe ishte privuar nga liria menjëherë pas marrjes së parave.

Propozim për paraburgim
Prokurori publik ka dorëzuar sot te gjyqtari i procedurës paraprake i Gjykatës Penale Themelore Shkup propozim për caktimin e masës së paraburgimit, duke vlerësuar se janë plotësuar kushtet ligjore për këtë masë.