Macron zbulon vendin ku mund të zhvillohet takimi Trump-Putin-Zelensky

Presidenti francez Emmanuel Macron ka bërë të ditur se është duke u punuar për organizimin e një takimi të rëndësishëm diplomatik mes presidentit rus Vladimir Putin dhe atij ukrainas Volodymyr Zelensky.

– Advertisement –
Në një intervistë për transmetuesin TF1-LCI, Macron tha se samiti do të zhvillohet në disa faza: fillimisht një takim dypalësh mes liderëve të Rusisë dhe Ukrainës, më pas një takim trepalësh ku do të jetë i pranishëm edhe presidenti amerikan Donald Trump, dhe në fund një tryezë shumëpalëshe me përfaqësues të vendeve europiane.

Si vend pritës për këtë samit po shqyrtohen disa opsione, por Gjeneva në Zvicër duket më e mundshme. Megjithatë, edhe Stambolli mbetet një alternativë, duke pasur parasysh se aty janë zhvilluar më parë bisedime mes palëve.

Ky zhvillim vjen në një moment delikat të luftës në Ukrainë, ku presidenti Zelensky ka shtuar përpjekjet për të siguruar mbështetje ushtarake dhe financiare nga Perëndimi, si dhe për të hapur rrugë diplomatike për zbutjen e konfliktit.

Përfshirja e presidentit amerikan Donald Trump në këtë proces shihet si një element që mund të ndikojë në dinamikën e negociatave, veçanërisht pas deklaratës së tij se “mund ta ndalë luftën shpejt” nëse vazhdon mandatin e tij në Shtëpinë e Bardhë.