Bujar Osmani takohet me Shefin e Misionit për Vëzhgimin e Zgjedhjeve Lokale të OSBE/ODIHR

Kandidati i Aleancës Kombëtare për Integrim për Komunën e Çairit, Bujar Osmani, zhvilloi sot një takim me Matteo Mecacci, Shefin e Misionit për Vëzhgimin e Zgjedhjeve Lokale të OSBE/ODIHR.

Pas takimit, Osmani ka vlerësuar lart punën e ODIHR-it dhe ka shprehur besimin se ky mision do të ndjekë me përpikëri procesin zgjedhor, duke evidentuar çdo keqpërdorim të mundshëm.

“E informova z. Mecacci për tensionet e shtuara në Çair dhe praktikat e palejuara që po përdoren nga kundërshtarët, si frikësimi i votuesve, përpjekjet për ryshfet dhe keqpërdorimi i resurseve publike për fushatë partiake,” tha Osmani.

Ai kërkoi nga ODIHR që të ketë një fokus të veçantë në komunën e Çairit, duke theksuar se, sipas tij, pushteti aktual është i vetëdijshëm për humbjen e mundshme dhe për këtë arsye po përdor mjete jodemokratike.

“Qëllimi ynë është i qartë: zgjedhje të lira, të ndershme, demokratike dhe transparente, ku zëri i qytetarëve do të jetë i vetmi fitues,” përfundoi Osmani.

Zgjedhjet lokale në Maqedoninë e Veriut pritet të mbahen në tetor dhe tashmë kanë nisur zhvillime të rëndësishme në disa komuna kyçe, përfshirë edhe Çairin.