Hungaria refuzon të ndalë blerjen e naftës ruse pavarësisht kërkesës së Trump-it ndaj NATO-s

Hungaria nuk do të heqë dorë nga furnizimet me energji nga Rusia, ka deklaruar ministri i Jashtëm i vendit për The Guardian, pavarësisht kërkesës së Shtëpisë së Bardhë që aleatët e NATO-s të ndalojnë blerjen e naftës ruse.

Donald Trump ka kërkuar që Evropa të ndalojë importet e naftës nga Rusia, por në një intervistë gjatë sesionit të 80-të vjetor të Asamblesë së Përgjithshme të OKB-së, Péter Szijjártó tha:

“Ne nuk mund të sigurojmë furnizim të sigurt për vendin tonë pa burimet e naftës apo gazit rus”, duke shtuar se ai e “kuptonte” qasjen e Trump-it.

“Për ne, furnizimet me energji janë një çështje thjesht fizike”, tha ai. “Është e bukur të ëndërrosh për të blerë naftë dhe gaz nga diku tjetër … por ne mund të blejmë vetëm nga aty ku kemi infrastrukturë. Dhe nëse e shikon infrastrukturën fizike, është e qartë se pa furnizimet ruse është e pamundur të sigurohet furnizimi i sigurt për vendin”.

Deklaratat e Szijjártó erdhën pasi Trump e lidhi vendosjen e sanksioneve të reja ndaj Rusisë me shkëputjen e NATO-s nga furnizimet me energji ruse.

“Jam gati të vendos sanksione të mëdha ndaj Rusisë kur të gjitha vendet e NATO-s të kenë rënë dakord dhe kanë nisur ta bëjnë të njëjtën gjë, dhe kur të gjitha vendet e NATO-s të ndalin blerjen e naftës nga rusia”, shkroi Trump javën e kaluar në platformën e tij Truth Social.

Kjo kërkesë pasoi disa afate që Trump i kishte vendosur Moskës për të treguar përparim drejt përfundimit të luftës në Ukrainë – afate që kaluan pa veprime të tjera. Disa aleatë vunë në dyshim nëse ai ishte serioz për të rritur presionin ndaj Vladimir Putinit apo thjesht po ia linte barrën Evropës.

Kompania shtetërore MOL e Hungarisë importon rreth 5 milionë tonë naftë në vit përmes tubacionit Druzhba, duke furnizuar rafineritë në Hungari dhe Sllovaki. Këto dy vende janë treguar më rezistentet ndaj thirrjeve për të ndalur importet e energjisë nga Rusia.

Kryeministri i Hungarisë, Viktor Orbán, është një nga aleatët më të afërt ideologjikë të Trump-it në Evropë dhe e ka lavdëruar shpesh atë. Orbán ka kritikuar ashpër Ukrainën, duke ruajtur njëkohësisht marrëdhënie të mira me Kremlinin.

Bloomberg raportoi se BE-ja po shqyrton kufizime tregtare që mund të reduktojnë ose ndalin furnizimet e naftës përmes këtij tubacioni, dhe se ato mund të miratohen pa konsensus unanim, duke i lejuar vendet e tjera evropiane të tejkalojnë votën e Budapestit dhe Bratislavës.

“Kur bëhet fjalë për blerjen e naftës ruse, tani praktikisht kemi vetëm Hungarinë dhe Sllovakinë”, shkroi Lindsey Graham, aleat i Trump dhe një nga mbështetësit më të mëdhenj të Ukrainës. “Shpresoj dhe pres që ata të veprojnë së shpejti për të na ndihmuar t’i japim fund kësaj gjakderdhjeje. Përndryshe, pasojat duhet dhe do të ndjekin”.

Liderët evropianë kanë ushtruar presion mbi Hungarinë dhe Sllovakinë për të ndaluar blerjen e naftës ruse, por apelimet janë injoruar.

Në një intervistë për The Guardian gjatë fundjavës, presidenti i Finlandës, Alexander Stubb – një nga liderët evropianë që komunikon më shpesh me Trump-in – tha se në deklaratat e fundit të tij ka “dy pista”: të bëhet më i ashpër ndaj Rusisë vetëm kur Evropa të rrisë tarifat ndaj Kinës dhe të ndalojë blerjen e naftës ruse.

“Pista e parë është që Evropa të ndalojë blerjen e naftës dhe gazit rus. Mendoj se Trump ka shumë të drejtë në këtë. Dhe këtu duhet të ushtrojmë presion mbi Hungarinë dhe Sllovakinë, të cilat ende e bëjnë”, tha Stubb. Kur u pyet për mjetet e presionit, ai shtoi: “Kjo i takon Komisionit”.

Në të kundërt, Stubb tha se Evropa nuk ka “mjetet ligjore” për tarifa, por mund të punojë për sanksione më të ashpra.

Ministri i Jashtëm i Polonisë, Radosław Sikorski, në një intervistë në Kiev javën e kaluar, tha se mbështet thirrjen e Trump-it që Evropa të ndalojë blerjen e naftës ruse. “Shpresoj që presidenti Orbán në Budapest ta dëgjojë këtë dhe të veprojë sipas apelimit të presidentit Trump për të ndaluar blerjen e naftës ruse. Hungaria mund ta marrë naftën e saj nga jugu”, tha Sikorski.

I pyetur të hënën për presionin evropian, Szijjártó i quajti zyrtarët e Evropës Perëndimore “fanatikë” dhe tha se ishte “totalisht e pamundur të bëhet një dialog i bazuar në fakte dhe arsyetim të shëndoshë”.

Megjithatë, ai shtoi se marrëdhëniet me SHBA-të janë përmirësuar ndjeshëm, duke thënë se Hungaria ishte “e vetmja qeveri evropiane që po shtrëngon duart për fitoren e [Trump-it]”.

“SHBA tani është një mik”, tha ai. “Pra, ta kesh presidentin amerikan si mik është diçka krejt ndryshe nga kur ai ushtron presion mbi ty. Çfarëdo që të vijë nga Brukseli është shumë, shumë e rëndë”.