Zelensky kërkoi raketat “Tomahawk” me rreze të gjatë nga SHBA-të, Vance: Shtëpia e Bardhë po shqyrton mundësinë

Uashingtoni po shqyrton mundësinë e vënies në dispozicion të Kievit raketa Tomahawk me rreze të gjatë veprimi, tha zëvendëspresidenti JD Vance për Fox News. Shtëpia e Bardhë po e “shqyrton” çështjen, tha ai të dielën.

Më parë, disa media perëndimore, përfshirë Wall Street Journal dhe The Telegraph, raportuan se Presidenti i Ukrainës Volodymyyr Zelensky kërkoi posaçërisht raketat nga SHBA-të gjatë një takimi me Trump në margjinat e Asamblesë së Përgjithshme të OKB-së në New York më herët këtë javë.

Sipas WSJ, Trump nuk e kundërshtoi idenë dhe ishte gjithashtu i hapur për heqjen e kufizimeve mbi përdorimin nga Kievi të armëve të prodhuara në SHBA në sulmet e thella në territorin rus, por nuk bëri asnjë angazhim specifik gjatë takimit. Presidenti më parë ishte kundër dhënies së raketave Tomahawk për Ukrainën, sipas Axios.

“Sigurisht që po e shqyrtojmë”, tha Vance kur u pyet nëse Uashingtoni po e shqyrton shitjen e raketave te anëtarët e tjerë të NATO-s në mënyrë që ato t’i dorëzohen Kievit. Kur u pyet më tej për çështjen e një përshkallëzimi të mundshëm që mund të pasojë një hap të tillë, Vance tha se Trump do të përcaktojë në fund të fundit rrjedhën e veprimit të Uashingtonit.

I dërguari special i presidentit amerikan, Keith Kellogg, i cili foli gjithashtu për Fox News të dielën, tha se “vendimi nuk është marrë ende”, ndërsa konfirmoi se Zelensky i kërkoi Trumpit raketa Tomahawk. Raketat kanë një rreze veprimi deri në 2,500 kilometra dhe mund të pajisen me koka bërthamore.