Italia “paralizohet” nga protestat mbarëkombëtare kundër Izraelit

Dhjetëra mijëra njerëz kanë dalë në rrugë anembanë Italisë në një grevë të përgjithshme në solidaritet me popullin e Gazës dhe flotiljen e ndihmave, e cila u ndalua nga ushtria izraelite përpara se të arrinte në Rrip.

Greva, e organizuar kryesisht nga sindikata më e madhe e Italisë, CGIL, ka paralizuar vendin, duke ndërprerë portet dhe trafikun rrugor.

Qindra trena u anuluan ose u vonuan, ashtu si edhe disa fluturime vendase, dhe shumë shkolla private dhe publike u mbyllën.

CGIL vlerësoi se rreth 100,000 njerëz kishin marrë pjesë në protestën në Milano, por policia lokale e vlerësoi këtë shifër në 50,000.

Demonstruesit në Milano mbushën Piazza Leonardo Da Vinci, duke valëvitur flamuj palestinezë dhe duke brohoritur “Liri Palestinës”.

Ndërkohë, 40,000 njerëz marshuan nga terminali i trageteve drejt qendrës së qytetit në Xhenova, dhe të paktën 10,000 protestuan në Brescia.

Mijëra njerëz bllokuan pikën e pagesës së autostradës A4 në Vicenza dhe marshimet prenë rrugët e hyrjes në qendrën historike të Venedikut.

Në Romë, stacioni qendror i trenit raportoi anulime të disa shërbimeve dhe vonesa deri në 80 minuta në të tjerat.

Më shumë se 10,000 protestues bllokuan portin në Napoli, ndërsa portet në Livorno dhe Salerno u bllokuan gjithashtu.

Zëvendëskryeministri Matteo Salvini e quajti grevën “të paligjshme” dhe bëri thirrje për dënime më të ashpra.

“Ata që organizojnë greva të paligjshme duhet të paguajnë për dëmet”, tha ai.

Ministri i Mbrojtjes Guido Crosetto tha se bllokimi i aksesit në transportin publik “nuk do t’u sjellë lehtësim palestinezëve”.

Protestuesit iu afruan gjithashtu portave të qendrës stërvitore të ekipit italian të futbollit në Firence për të kërkuar që ndeshja e ardhshme kualifikuese e Kupës së Botës kundër Izraelit të mos luhet për shkak të luftës në Gaza.

Bëhet e ditur se Italia është planifikuar të presë Izraelin në Udine më 14 tetor, por UEFA po shqyrton pezullimin e Izraelit për shkak të luftës.

Lojtarët nuk ishin në qendrën stërvitore Coverciano në Firence, por skuadra do të mblidhet atje të hënën.

Sekretari i Përgjithshëm i CGIL, Maurizio Landini, e mbrojti grevën si “plotësisht të ligjshme” dhe u zotua të kundërshtonte një vendim zyrtar se ishte e paligjshme sepse organizatorët nuk dhanë njoftim të mjaftueshëm paraprak.