Parashikimi i një rezultati për Strugën!

Me rastin e zgjedhjeve lokale të vitit 2021, katër vite më parë kam botuar shkrimin në gazetën Lajm dhe Fakti Ditor, në lidhje me atë se kush e fiton garën për kreun e Strugën.
Dhe parashikimi im doli 100% i saktë, ku shpjegoja “deleve” shqiptare se Merko i fitonte këto zgjedhje pa as një dyshim, pasi kishte mbështetje si nga komitët ashtu edhe nga titistët e rinj.

Këtë radhë në garën për kreun e Strugës janë dy kandidatë më të rëndësishëm, njëri është oligarku i Mickos Mendi Qyra, dhe tjetri Dr. Arsim Dalipi i AKI-së, ku gara do jetë e fortë mes bllokut shqiptar përballë komitëve të VMRO-së dhe opozitës shqiptare, e vështirë për shkak të futjes së Kalit të Trojës në këtë garë, Mendiun e VMRO-së dhe opozita e bashkuar shqiptare që garon me Dr.Dalipin, i cili shihet si favorit nga anketat e ndryshme.
Turi i dytë do ta përcaktoj fituesin, duke i mobilizuar militantët secili kamp për llogari të tyre.

Ajo që ngelet pa u sqaruar për zgjedhësit është decentralizimi i pushtetit lokal si mjet i qeverisë despotike per t’i konrtolluar komunat nga “majorizimi” i shqiptarëve mbetet mollë e ndaluar!
Partiçkat tona politike janë pajtuar me këtë lloj pushteti lokal të varur dhe të kapur nga despotët e Shkupit, për hir të interesave te ngushta partiake dhe klanore.

Ashtu siç kam thënë para katër viteve se kështu do të ndodh edhe me fituesin e 19 tetorit për të njëjtat arsye se: – “Prandaj, Merko apo Istrefi nuk bëjnë dot tutje përpara mbi kompetencat e kufizuara që kanë komunat, pasi partitë politike shqiptare me pushtetin qendror kanë rënë dakord më herët për kufizimin e tyre për shkak të leverdive që përfitojnë partitë shqiptare nga ky pushtet, duke e mbyllur këtë çështje të autonomisë teritoriale dhe lokale siç është përqëndrimi i pushtetit policor nga ai komunal në atë rajonal të drejtorive të policisë.
Ky sistem i qeverisjes lokale nuk është decentralizim i pushtetit lokal, por cenralizim rajonal me motive politike të dominimit dhe supremacisë etnike.
Ndaj, edhe në këto zgjedhje shqiptarët do zgjedhin kryetarin por jo dhe problemet ekonomike, shëndetësore, dinjitetin dhe barazinë e shqiptarëve nëpër ato komuna ku garojnë kandidatët shqiptarë”.

Medai Shaholli