Kur presidenti Meidani paralajmëroi: Beogradi po nxit konfliktin në Ballkan

Në pranverën e vitit 1999, Ballkani po përjetonte një nga momentet më të tensionuara në historinë moderne. Konflikti në Kosovë ishte në kulm, dhe Shqipëria ishte në qendër të një krize humanitare dhe politike. Në këtë kontekst, presidenti i atëhershëm i Republikës së Shqipërisë, Rexhep Meidani, dha një intervistë për gazetën gjermane Süddeutsche Zeitung, të cilën e transmetoi edhe gazeta shqiptare “Flaka”. Fjalët e tij mbeten një paralajmërim historik për politikat destabilizuese të Beogradit, percjell PressOnline.

“Ndaj provokacioneve në territorin dhe kufirin tonë nuk kemi reaguar deri më tani, ngase me një akt të tillë do të luanim lojën e Beogradit,” — deklaronte Meidani. Ai e cilësoi situatën si një përplasje ndërmjet dy mentaliteteve: njëri bazuar në “pastrime etnike, deportime dhe diktaturë”, tjetri në “demokraci, respektimin e të drejtave dhe zhvillim ekonomik”.
Në atë kohë, Shqipëria kishte pranuar mbi 300 mijë refugjatë kosovarë, ndërsa ofronte terrenin dhe infrastrukturën ushtarake për NATO-n. Sipas Meidanit, kjo nuk ishte vetëm një çështje humanitare, por edhe një garanci sigurie dhe stabiliteti për popullin shqiptar dhe për Ballkanin. Ai paralajmëroi se pa praninë e NATO-s dhe pa një plan ndërkombëtar për Kosovën, situata mund të degeneronte.

Një nga mesazhet kryesore të intervistës ishte hedhja poshtë e ideve për një “Shqipëri të Madhe”, duke e cilësuar atë si një produkt propagandistik të Beogradit. Meidani kërkonte që komuniteti ndërkombëtar të merrte përsipër një administrim ndërkombëtar të Kosovës si zgjidhje tranzitore, duke u bazuar më vonë në vullnetin e popullit për një zgjidhje përfundimtare.

“Problemi kryesor qëndron si të realizohet rikthimi i refugjatëve në qytetet dhe fshatrat e tyre. Për këtë është i nevojshëm imponimi ndërkombëtar dhe prania ushtarake e NATO-s,” — deklaronte ai.
Në fund të intervistës, Meidani parashikonte një vizion për të ardhmen e Ballkanit: një “plan Marshall” për rajonin, me zhvillim ekonomik si mjet për zbutjen e ndjenjave nacionaliste dhe integrimin e vendeve të Ballkanit në Europë. Ai paralajmëroi se pa një angazhim të tillë, rajoni do të mbetej i brishtë dhe i ekspozuar ndaj politikave destabilizuese. percjell PressOnline.al

Këto fjalë, më shumë se dy dekada më parë, mbeten një kujtesë për rëndësinë e paqes dhe bashkëpunimit ndërkombëtar në Ballkan — një mesazh që vijon të ketë relevancë edhe sot.