Asnjë vlerësim pozitiv për mbrojtjen e të dhënave personale në RMV

Për tetë muajt e parë të vitit 2025, Agjencia për Mbrojtjen e të Dhënave Personale paraqiti vetëm 2 kërkesa për fillimin e procedurave kundërvajtëse. Por institucionet vazhdojnë të zbulojnë identitetin e qytetarëve, emrat dhe mbiemrat, llogaritë bankare, numrat e identitetit, numrat e telefonit në faqet e internetit të institucioneve. Nuk ka përparim në mbrojtjen e të dhënave personale, pohon gjithashtu Komisioni Evropian, përcjell “REL” në gjuhën maqedonase.

Për tetë muaj, në periudhën nga janari deri në gusht 2025, mbikëqyrësit në Agjencinë për Mbrojtjen e të Dhënave Personale kanë paraqitur vetëm 2 kërkesa për fillimin e procedurave kundërvajtëse.

Në muajin gusht “Radio Evropa e Lirë” njoftoi se faqet e internetit të një numri të madh institucionesh shtetërore dhe komunash kanë publikuar identitete të plota të zbuluara të qytetarëve – nga emrat dhe mbiemrat, llogaritë bankare, numrat e identitetit, adresat e shtëpisë dhe të email-it, numrat e telefonit.

Kjo është në kundërshtim me Ligjin për Mbrojtjen e të Dhënave Personale, pasi çdo kontrollues është i detyruar të kryejë një vlerësim të rrezikut para publikimit, dhe nëse publikohen të dhëna personale, të zbatojë masat e mëposhtme: anonimizimin ose pseudonimizimin e të dhënave personale, kufizimin e aksesit.

Një nga keqpërdorimet më të zakonshme të të dhënave personale në vitet e fundit është vjedhja e identitetit të personave të tjerë, ku mashtruesit marrin kredi në emër të tyre.