Zyrtari izraelit “zbërthen” planet për sulm të ri në Gaza: Synojmë që në mars të…
Izraeli ka hartuar plane për nisjen e operacioneve të reja ushtarake intensive në Rripin e Gazës gjatë muajit mars, me objektiv kryesor Qytetin e Gazës dhe zgjerimin e mëtejshëm të kontrollit mbi enklavën palestineze, raporton Times of Israel, duke cituar një zyrtar izraelit dhe një diplomat arab.
Operacioni i planifikuar parashikon zhvendosjen e të ashtuquajturës “Vijë e Verdhë” – vija e armëpushimit – më në perëndim, drejt bregdetit të Gazës. Një lëvizje e tillë do të rriste përqindjen e territorit të kontrolluar nga Forcat e Armatosura Izraelite (IDF).
Megjithatë, operacioni nuk pritet të vijojë pa mbështetjen e Shteteve të Bashkuara. Sipas diplomatit arab, Uashingtoni vazhdon të kërkojë kalimin e armëpushimit të brishtë, të arritur në tetor, në fazën e dytë, e cila përfshin çarmatimin e Hamasit. Edhe pse kryeministri izraelit Benjamin Netanyahu ka rënë dakord të bashkëpunojë me përpjekjet amerikane, ai dyshohet se nuk beson se këto përpjekje do të çojnë në çarmatimin e Hamasit, ndaj i ka kërkuar IDF-së përgatitjen e një plani alternativ ushtarak.
Sipas Wall Street Journal, një ofensivë e re mund të zhvillohet më shpejt se më parë. Studiuesi Erez Winner nga Qendra Izraelite për Strategji të Madhe deklaroi se një sulm i ri ndaj Hamasit do të ishte më i lehtë, duke qenë se rreziku i pengjeve është zvogëluar ndjeshëm. Ai shtoi se edhe evakuimi i civilëve palestinezë do të ishte më i thjeshtë, pasi shumica jetojnë aktualisht në tenda, me skenarë që parashikojnë transferimin e tyre në zona nën kontroll izraelit.
Në ditën e parë të armëpushimit, më 10 tetor, forcat izraelite u tërhoqën në Vijën e Verdhë, duke ruajtur kontrollin e rreth 53% të Rripit të Gazës. Operacioni i planifikuar për në mars pritet ta rrisë më tej këtë përqindje. Ndër strategjitë në shqyrtim janë marrja e plotë e Qytetit të Gazës për të detyruar dorëzimin e shpejtë të Hamasit, ose një pushtim gradual i gjithë Rripit.
Ndërkohë, pavarësisht armëpushimit, sulmet izraelite kanë vazhduar. IDF njoftoi se ka vrarë tre persona të armatosur në incidente të ndara, duke pretenduar se ata kishin kaluar Vijën e Verdhë dhe përbënin kërcënim të menjëhershëm për trupat izraelite. Ushtria theksoi se forcat e Komandës Jugore mbeten të dislokuara në zonë dhe do të vazhdojnë të veprojnë për të neutralizuar çdo kërcënim.
