Vrasësi serial nga Kumanova pranoi tri nga katër vrasjet e grave për të cilat po gjykohet

Trajko Bojkovski, i akuzuar për katër vrasje në territorin e Nagoriçanit të Vjetër, në seancën e sotme në Gjykatën Themelore të Kumanovës pranoi se ka kryer tri nga veprat për të cilat akuzohet.

Në seancë dëshmoi prof. dr. Stojan Bajraktarov, specialist i psikiatrisë dhe psikiatrisë forenzike, i cili kishte kryer ekspertizën profesionale të të akuzuarit. Sipas konstatimit të tij, Bojkovski ka aftësi të kufizuara intelektuale, në kufirin mes aftësive intelektuale lehtësisht të reduktuara dhe aftësive normale.

Bajraktarov theksoi se i akuzuari ishte në gjendje të përshkruante ngjarje të caktuara dhe veprimet e tij. Si shembull përmendi momentin kur Bojkovski ishte larguar me vrap nga shtëpia e njërës prej viktimave, pasi kishte vërejtur një makinë të bardhë dhe kishte menduar se po vinte djali i saj.

Bojkovski akuzohet për vrasjen e katër grave në territorin e Nagoriçanit të Vjetër. Shumica e viktimave ishin gra të moshuara që jetonin vetëm, ndërsa njëra prej tyre ishte më e re.

Fjalët përfundimtare në procesin gjyqësor janë caktuar për 6 tetor.