Pa Nobelin, s’ka paqe, mesazhi tronditës i Trump për Europën
Presidenti i SHBA, Donald Trump, ka deklaruar se nuk ndihet më i detyruar të mendojë vetëm për paqen, pasi nuk mori Çmimin Nobel për Paqen, duke përsëritur njëkohësisht kërkesën e tij për marrjen nën kontroll të Groenlandës.
Në një mesazh drejtuar kryeministrit të Norvegjisë, Jonas Gahr Store, Trump fajësoi vendin për mosdhënien e çmimit, duke thënë: “Duke qenë se vendi juaj vendosi të mos më japë Çmimin Nobel për Paqen për faktin se kam ndalur 8 luftëra PLUS, nuk ndihem më i detyruar të mendoj thjesht për Paqen, megjithëse ajo do të mbetet gjithmonë mbizotëruese, por tani mund të mendoj edhe për atë që është e mirë dhe e drejtë për SHBA-në”.
Ai shtoi se “Bota nuk është e sigurt nëse ne nuk kemi Kontroll të Plotë dhe Total mbi Groenlandën”.
CBS News konfirmoi autenticitetin e mesazhit. Støre tha se e kishte marrë atë si përgjigje ndaj një mesazhi që ai dhe presidenti i Finlandës, Alexander Stubb, i kishin dërguar Trump, ku kundërshtonin rritjen e tarifave dhe kërkonin ulje tensionesh për çështjen e Groenlandës.
Kryeministri norvegjez theksoi se Çmimi Nobel për Paqen jepet nga një komitet i pavarur dhe jo nga qeveria. Trump, nga ana e tij, ka këmbëngulur se SHBA-ja duhet të marrë nën kontroll Groenlandën për arsye sigurie kombëtare, duke mos përjashtuar as përdorimin e forcës ushtarake kundër një vendi anëtar të NATO-s.
Ai ka paralajmëruar vendosjen e tarifave deri në 25 për qind ndaj aleatëve që kundërshtojnë planin e tij dhe ka vënë në dyshim të drejtën e Danimarkës mbi Groenlandën, duke deklaruar se “nuk ka dokumente të shkruara” që e justifikojnë atë.
Ndërkohë, kryeministri britanik Keir Starmer ka reaguar duke thënë se çdo vendim për statusin e Groenlandës i përket vetëm popullit të saj dhe Mbretërisë së Danimarkës, ndërsa Danimarka, Groenlanda dhe aleatët e NATO-s kanë vendosur të rrisin praninë ushtarake në Arktik.
Çmimi Nobel për Paqen këtë vit iu dha lideres së opozitës venezueliane María Corina Machado, e cila më pas ia dorëzoi medaljen Trumpit, ndonëse Fondacioni Nobel ka theksuar se çmimi nuk mund të transferohet, as simbolikisht.
