Hoxha-Soriano Ortiz: Përvoja spanjolle e dobishme për politikat mjedisore të vendit

Ministri i Mjedisit Jetësor dhe Planifikimit Hapësinor, Muamet Hoxha, sot zhvilloi një takim pune me ambasadorin e Mbretërisë së Spanjës në Maqedoninë e Veriut, Rafael Soriano Ortiz.

Gjatë takimit u shkëmbyen mendime për përmirësimin e bashkëpunimit dypalësh në fushën e mjedisit, duke theksuar mbështetjen e vazhdueshme të Qeverisë së Spanjës për aktivitete të orientuara drejt mbrojtjes së vlerave natyrore dhe zhvillimit të politikave mjedisore.

Ministri Hoxha po ashtu theksoi mbështetjen e vazhdueshme të Mbretërisë së Spanjës për integrimet evropiane të Maqedonisë së Veriut, duke theksuar se kjo përfaqëson një shtytje të rëndësishme për avancimin e proceseve reformuese dhe për harmonizimin me standardet evropiane, veçanërisht në fushën e mjedisit.

Një fokus i veçantë u vu mbi rëndësinë e përvojës spanjolle dhe praktikave të mira në krijimin dhe zbatimin e politikave mjedisore, të cilat përbëjnë një bazë të dobishme për përmirësimin e mëtejshëm të politikave shtetërore dhe forcimin e kapaciteteve institucionale.

Bashkëbiseduesit konfirmuan angazhimin e përbashkët për vazhdimin e bashkëpunimit dhe intensifikimin e shkëmbimit të përvojave, me qëllim zbatimin e zgjidhjeve të qëndrueshme dhe përmbushjen e obligimeve ndërkombëtare të vendit në fushën e mjedisit.