“Ai u zhduk”, legjenda e futbollit francez thotë se Harry Kane nuk ka kurrëfarë mundësie ta fitojë Topin e Artë

Legjenda e Francës dhe e Premierligës, Emmanuel Petit, ka shuar shpresat e Harry Kane për ta fituar Topin e Artë, duke deklaruar se sulmuesi anglez “u zhduk” në momentet vendimtare si me klubin ashtu edhe me kombëtaren.

Ish-mesfushori argumentoi se, pavarësisht numrit të madh të golave në Gjermani, mungesa e ndikimit të Kane në ndeshjet eliminatore të Ligës së Kampionëve dhe Kupës së Botës 2026 e lë atë pas rivalëve kryesorë për çmimin.

Eliminimi dramatik i Anglisë nga Kupa e Botës ka dëmtuar ndjeshëm pozitën e Kane në garën për çmimet individuale.

Duke folur për “Mr Gamble”, fituesi i Kupës së Botës me Francën bëri një vlerësim të ashpër për sezonin e sulmuesit të Bayern Munichut, duke thënë se golat e tij në kampionat nuk kanë të njëjtën peshë për shkak të mungesës së ndikimit në sfidat më të rëndësishme.

“Shanset e Harry Kane për Topin e Artë kanë marrë fund. Nëse e bazon këtë vetëm te Bundesliga, atëherë nuk ka asnjë problem. Por në Ligën e Kampionëve dhe me kombëtaren, kur gjërat u bënë vërtet të vështira, mendoj se ai u zhduk. Nuk mund ta fajësoj, sepse bëri gjithçka që mundi dhe shënoi shumë gola, por nuk pati ndikim në ndeshjet e mëdha, ashtu si edhe në Ligën e Kampionëve. Mendoj se ka disa emra përpara tij”, u shpreh Petit.

I pyetur se kush mund të jetë favorit për ta fituar Topin e Artë, Petit përmendi disa nga lojtarët që spikatën në Kupën e Botës, por pa veçuar një emër të vetëm.

“Lamine Yamal? Ai zhvilloi një Kupë Bote të shkëlqyer. Rregullat për Topin e Artë kanë ndryshuar shumë, ashtu si edhe rregullat në fushë. Rodri ka qenë sërish lojtari më i mirë gjatë këtij kompeticioni. Messi gjithashtu zhvilloi një turne shumë të mirë, por ai luan për Inter Miami”, shtoi ai.

Petit pranoi se Kupa e Botës ka një peshë të jashtëzakonshme në garën për Topin e Artë, por paralajmëroi se vendimi nuk duhet të ndikohet nga faktorë të tjerë.

“E di që Kupa e Botës është mbi çdo trofe që mund të fitosh me klubin. Por, në të njëjtën kohë, duhet të fitosh edhe tituj. A do të jetë një lojtar spanjoll? Nuk e di. Gara do të jetë shumë e fortë. Dhe, në fund, shpresoj që vendimi të mos jetë një zgjedhje komerciale”, vazhdoi ai.

Kane pati, ndoshta, sezonin më të mirë të karrierës së tij. Në të gjitha garat, ai realizoi 61 gola në 51 paraqitje, përfshirë 36 gola në Bundesliga, duke u shpallur golashënuesi më i mirë i kampionatit. Ai shtoi edhe 14 gola në Ligën e Kampionëve, 10 në Kupën e Gjermanisë dhe një në Superkupën Franz Beckenbauer, duke ndihmuar Bayern Munich të fitojë tripletën vendase: Bundesligën, Kupën e Gjermanisë dhe Superkupën. Për paraqitjet e tij, ai u nderua edhe me Këpucën e Artë Evropiane.

Megjithatë, sezoni i tij u zbeh nga zhgënjimi në Ligën e Kampionëve, ku Bayern u eliminua nga Paris Saint-Germain në gjysmëfinale, ndërsa skuadra franceze më pas mbrojti titullin duke mposhtur Arsenalin në finale.

Edhe aventura e tij me Anglinë në Kupën e Botës pati një fund të hidhur. Kapiteni anglez shënoi gjashtë gola në shtatë ndeshje, por nuk arriti ta shmangte humbjen 2-1 ndaj Argjentinës në gjysmëfinale. Anglia më pas e mbylli turneun në vendin e tretë, pasi mposhti Francën në ndeshjen për medaljen e bronztë.