ALARMANTE: Për gjashtë muaj janë shpenzuar 1.6 miliardë euro në kazino dhe bastore në Maqedoni

Të dhënat nga Drejtoria e të Ardhurave Publike tregojnë se gjatë gjysmës së parë të këtij viti, qytetarët e Maqedonisë dhe shtetasit e huaj kanë shpenzuar gjithsej gati 1.6 miliardë euro në lojëra fati.

Pjesa më e madhe e kësaj shume është shpenzuar në aparate elektronike të lojërave të fatit, ndërsa kazinotë dhe bastoret vazhdojnë të zënë një pjesë të konsiderueshme të tregut.

Shifrat tregojnë se sektori i lojërave të fatit mbetet financiarisht gjigant, pavarësisht masave të reja që synojnë kufizimin e afërsisë së objekteve të lojërave të fatit me shkollat dhe institucionet e tjera arsimore.

Nga ana tjetër, organizatorët e lojërave të fatit kundërshtojnë zhvendosjen e objekteve të tyre, duke argumentuar se një masë e tillë nuk do ta eliminojë bixhozin, por mund të krijojë hapësirë për rritjen e aktiviteteve të paligjshme që lidhen me lojërat e fatit.

Sipas tyre, largimi i kazinove, sallave me aparate elektronike dhe bastoreve nga afërsia e drejtpërdrejtë me institucionet arsimore nuk do ta zvogëlojë bixhozin, por mund të bëjë që një pjesë e aktivitetit të zhvendoset në kanale jashtë kontrollit dhe mbikëqyrjes së shtetit.