Shasivari takon përfaqësuesin e Katarit: Avancim i bashkëpunimit në fushën e drejtësisë

Ministri i Drejtësisë, Jeton Shasivari, zhvilloi sot takim me të ngarkuarin me punë në Ambasadën e Shtetit të Katarit, Rashid bin Saeed Al-Khayareen, ku u diskutua për mundësitë e thellimit të marrëdhënieve dypalëshe dhe hapjen e një kapitulli të ri të bashkëpunimit institucional në fushën e drejtësisë.
Gjatë takimit, Shasivari theksoi rëndësinë e vendosjes së kontakteve të drejtpërdrejta me Ministrinë e Drejtësisë së Katarit dhe institucionet e saj të specializuara, me fokus në trajnimin e profesionistëve juridikë, luftën kundër korrupsionit dhe krimit financiar, si dhe digjitalizimin e sistemit të drejtësisë.
Marrëdhëniet ndërmjet vendit tonë dhe Katarit po zhvillohen vazhdimisht. Konsultimet politike të mbajtura në Doha në korrik 2026 dhe nënshkrimi i Memorandumit të Bashkëpunimit në fushën e punës në shtator të këtij viti dëshmojnë për potencialin e zgjerimit të mëtejshëm të bashkëpunimit.
Në këtë drejtim, ministri Shasivari shprehu interesimin për të shqyrtuar mundësitë e mbështetjes teknike dhe financiare për projekte prioritare në kuadër të reformave në drejtësi, me synimin që bashkëpunimi të përkthehet në projekte konkrete dhe rezultate të matshme.
Marrëdhëniet e mira diplomatike krijojnë mundësi, ndërsa bashkëpunimi institucional i kthen ato në rezultate.
Ministria e Drejtësisë synon që marrëdhëniet me Katarin të shkojnë përtej dialogut diplomatik dhe të sjellin përfitime konkrete për institucionet dhe qytetarët e të dy vendeve.