Klekovski: Nga vlerësimi drejt një plani kombëtar për cilësinë, me përgjegjësi të qarta, rezultate të matshme dhe afate reale

Me mbështetjen e Organizatës Botërore të Shëndetësisë (OBSH) dhe në bashkëpunim me Agjencinë për Cilësi dhe Akreditim të Institucioneve Shëndetësore (AKAZUM), sot u mbajt punëtoria e dytë kombëtare, kushtuar forcimit të Kornizës Kombëtare për Cilësinë e Kujdesit Shëndetësor.

Në punëtori mbajti fjalim ministri i Shëndetësisë, Sasho Klekovski.

Në punëtori u prezantuan rezultatet e vlerësimit kombëtar të cilësisë së kujdesit shëndetësor. Vlerësimi është realizuar gjatë muajve të fundit, me mbështetje profesionale nga Zyra e OBSH-së në Shkup dhe Zyra e OBSH-së për Cilësinë e Kujdesit Shëndetësor dhe Sigurinë e Pacientëve në Athinë, duke zbatuar instrumentin e OBSH-së për vlerësimin kombëtar të cilësisë.

Vlerësimi përfshiu shqyrtimin e dokumenteve, konsultimet me institucionet, punonjësit shëndetësorë dhe përfaqësuesit e pacientëve, si dhe vizita në terren në klinika, spitale dhe institucione të kujdesit shëndetësor parësor.

Vlerësimi tregon se vendi ka baza të rëndësishme për cilësinë: kornizën ligjore, Strategjinë e Shëndetësisë 2021–2030, Planin Kombëtar për Sigurinë e Pacientëve, mekanizmat e akreditimit dhe sistemet digjitale, siç është „Termini Im“. Sfida kryesore është që këto elemente të ndërlidhen në një sistem kombëtar funksional, me përgjegjësi të qarta, burime të përshtatshme dhe monitorim të rregullt të përparimit.

„Kemi ligje, strategji dhe sisteme, por ato ende nuk funksionojnë si një sistem i vetëm. Sfida jonë nuk është të miratojmë dokumente të reja, por të sigurojmë që dokumentet ekzistuese të zbatohen realisht në praktikë“, deklaroi ministri Klekovski.

Ministri veçoi tri prioritete: sigurinë e pacientëve dhe tejkalimin e kulturës së mosndëshkimit, ndërlidhjen e financimit të shërbimeve shëndetësore me cilësinë dhe përcaktimin e qartë të përgjegjësive të çdo institucioni.
„Një gabim që nuk raportohet është një gabim që do të përsëritet. Na nevojitet një sistem në të cilin raportimi është i mbrojtur dhe nga i cili mësojmë, ndërsa punonjësi shëndetësor që raporton merr mbështetje dhe jo pasoja“, theksoi Klekovski.

Hapi i ardhshëm është përgatitja e Planit Kombëtar për Cilësinë e Kujdesit Shëndetësor. Ministria do të ketë rol udhëheqës në këtë proces, ndërsa Plani do të përmbajë një numër të kufizuar prioritetesh, institucionet përgjegjëse, burimet e nevojshme, afatet kohore dhe treguesit për monitorimin e përparimit.

„Nuk na nevojitet edhe një dokument që do të mbetet vetëm në letër. Për çdo prioritet do të dihet se kush është përgjegjës, deri kur duhet të realizohet dhe si do ta masim përparimin“, theksoi ministri.

Paralelisht, Ministria po punon për avancimin e kornizës ligjore për cilësinë, me qëllim vendosjen e standardeve dhe mekanizmave për menaxhimin e cilësisë dhe monitorimin e rezultateve.