Irani kërcënon bazat amerikane në Europë: Raketat balistike mund të arrijnë deri në Britaninë e Madhe
Televizioni shtetëror iranian ka paralajmëruar se versionet e modifikuara të raketës balistike Khorramshahr mund të arrijnë deri te bazat ushtarake amerikane në Evropë, duke përmendur konkretisht edhe bazën ajrore RAF Fairford në Britaninë e Madhe.
Në një raport të transmetuar të shtunën, televizioni iranian deklaroi se rrezja e veprimit të raketave të vendit nuk kufizohet vetëm në distancat e njohura deri më tani. Sipas tij, ndryshimet në kokën luftarake të raketës Khorramshahr mund t’i rrisin ndjeshëm aftësitë e saj për të goditur objektiva në distanca më të largëta.
Raketa Khorramshahr-4, e prezantuar në vitin 2023, ka një rreze veprimi të deklaruar prej 2 mijë kilometrash dhe mund të mbajë një kokë luftarake me peshë deri në 1.500 kilogramë. Një kokë luftarake më e lehtë mund të mundësojë rritjen e rrezes së saj, megjithatë shkalla e këtij zgjerimi mbetet e pakonfirmuar.
Transmetimi përfshinte edhe një përmbledhje të raketave dhe dronëve që Irani ka përdorur në përplasjet me Izraelin dhe Shtetet e Bashkuara që prej qershorit 2025. Televizioni e paraqiti Khorramshahr-in si pjesë të një arsenali që, sipas pretendimeve të tij, mund të kërcënojë edhe instalimet amerikane shumë larg territorit iranian.
Në mesazhin drejtuar Britanisë, raporti vuri në dyshim edhe aftësinë mbrojtëse të sistemeve britanike, duke sugjeruar se ato nuk janë domosdoshmërisht më të fuqishme se ato izraelite, të cilat, sipas televizionit iranian, janë depërtuar më parë nga raketat e Teheranit.
Megjithatë, deri më tani nuk ka asnjë konfirmim të pavarur se Irani zotëron një version të modifikuar të Khorramshahr-it, me rreze të mjaftueshme për të goditur bazën RAF Fairford.
Gjatë transmetimit u përmend edhe një direktivë e liderit suprem të Iranit, Mojtaba Khamenei, sipas së cilës forcat e armatosura iraniane nuk duhet të kenë kufizime gjeografike në përgjigjen ndaj sulmeve amerikane apo izraelite.
Më 31 tetor, Khamenei kërkoi kundërpërgjigje të menjëhershme dhe efektive, pa kufizime gjeografike, si dhe urdhëroi komandantët ushtarakë të përditësonin listën e objektivave të mundshëm.
Pas kësaj deklarate, Garda Revolucionare e Iranit njoftoi se ishte hequr kufiri prej 2 mijë kilometrash, të cilin vendi e kishte respektuar deri më tani për rrezen e raketave balistike. Megjithatë, autoritetet iraniane nuk kanë sqaruar nëse janë zhvilluar apo janë vënë në përdorim raketa me rreze më të madhe veprimi.
Paralajmërimi i fundit vjen pas disa deklaratave të zyrtarëve të lartë iranianë, të cilët kanë kërcënuar se bazat amerikane në Evropë dhe në ishuj të largët mund të bëhen objektiva në rast të sulmeve të tjera nga Uashingtoni.
Sekretari i Këshillit të Lartë të Sigurisë Kombëtare të Iranit, Mohsen Rezaei, deklaroi më herët gjatë kësaj jave se Teherani nuk do ta kufizojë më kundërpërgjigjen vetëm te instalimet ushtarake amerikane në rajon, por mund të godasë edhe baza në vende evropiane.
Kërcënimet vijnë në një moment kur përpjekjet diplomatike për t’i dhënë fund luftës kanë mbetur në vendnumëro. Teherani kërkon që Shtetet e Bashkuara t’i japin fund bllokadës detare ndaj porteve iraniane dhe të lehtësojnë sanksionet përpara rifillimit të negociatave.
Nga ana tjetër, Uashingtoni ka vijuar presionin ekonomik ndaj Iranit. Presidenti amerikan Donald Trump ka deklaruar se synon një fitore të plotë ndaj Teheranit, ndërsa ka lënë të kuptohet se Shtetet e Bashkuara nuk kanë më nevojë për një marrëveshje përmes negociatave.
Raporti i fundit i televizionit shtetëror iranian shkon më tej se paralajmërimet e mëparshme, pasi për herë të parë përmend konkretisht një instalim ushtarak britanik dhe e lidh kërcënimin me pretendimin për një version me rreze të zgjeruar të raketës balistike Khorramshahr.
