Zelensky: Rusia respekton vetëm forcën, Evropa duhet të bashkohet për t’i dhënë fund luftës

Presidenti i Ukrainës, Volodymyr Zelensky, ka bërë thirrje për forcimin e unitetit evropian dhe për një qëndrim më të vendosur ndaj Rusisë, duke theksuar se Moska respekton vetëm forcën dhe se pikërisht kjo është e nevojshme për ta detyruar t’i japë fund luftës.

Në një postim në platformën X, Zelensky deklaroi se presidenti rus Vladimir Putin po e vendos Rusinë përballë Evropës dhe gjithçkaje që qytetarët evropianë vlerësojnë, pavarësisht bindjeve të tyre politike.

“Rusia nuk respekton asgjë tjetër përveç forcës, dhe pikërisht për këtë arsye nevojitet forca për ta detyruar Rusinë t’i japë fund kësaj lufte”, deklaroi presidenti ukrainas.

Sipas Zelenskyt, lufta kundër Ukrainës dëshmon qëndrimin e vërtetë të Rusisë ndaj jetës njerëzore, shteteve të tjera dhe respektimit të rregullave ndërkombëtare.

“Përmes luftës kundër Ukrainës, Rusia tregon se si e vlerëson vërtet jetën njerëzore, vendet e tjera dhe çdo lloj sundimi. Nëse Evropa nuk është e fortë, gjithçka që ajo vlerëson do të humbasë. Ne nuk duhet ta lejojmë këtë të ndodhë dhe mund ta parandalojmë”, u shpreh Zelensky.

Presidenti ukrainas theksoi se forcimi i Evropës duhet të mbështetet edhe në bashkëpunimin e ngushtë me Ukrainën, duke bashkuar kapacitetet e të dyja palëve për të garantuar sigurinë dhe paqen.

“Me Ukrainën në Evropë dhe me një Evropë më të fortë, duke bashkuar forcën e Evropës me atë të Ukrainës. Paqja vjen kur uniteti i atyre që e mbrojnë nuk lë hapësirë për luftë. Dhe kjo është ajo që duhet të arrijmë”, përfundoi Zelensky.