Grubi: Maqedonia e Veriut është në Europë dhe drejt këtij destinacioni nuk do të lejojmë askënd të na pengojë!

Zëvendëskryeministri i parë, Artan Grubi ishte sot pjesëmarrës në Konferencën vjetore të Qeverisë.

Përmes një postimi në faqen e tij zyrtare në Facebook, Grubi shkruan se në Konferencë përveç arritjeve të kësaj qeverie është përmendur dhe ndikimi rus si qendër për destabilizim dhe dezorientim nga rruga europiane e vendit.

Grubi ka potencuar se Maqedonia e Veriut është e përkushtuar drejt integrimit në Bashkimin Europian.

Statusi i plotë:

Në konferencën vjetore të Qeverisë me moton “Vit i mundësive europiane” potencova përveç sukseseve edhe të gjitha sfidat me të cilat u përballëm gjatë këtij mandati të qeverisjes, tentativat e njëpasnjëshme të destabilizimit e dezorientimit nga rruga jonë europiane që vijnë nga një qendër e vetme – Rusia.

Eksponentët rus i kemi gjithkund për të prishur kohezionin e kësaj qeverisje progresive dhe miqësinë e mirë me gjithë aleatet tanë, ndaj me Frontin Europian po bashkojmë forcat për t’i dhënë fund njëherë e përgjithmonë ndikimit rus që është gjenerator i krizës globale ekonomike dhe energjetike.

Vendi i Maqedonisë së Veriut është në Europë dhe drejt këtij destinacioni nuk do të lejojmë askënd të na pengojë më hapin!