Media holandeze: Shqipëria nuk përmbushi objektivin e NATO-s për shpenzimet e mbrojtjes! Rrezikon mbajtjen e samitit vitin e ardhshëm

Edhe pse NATO njoftoi në muajin mars se të gjitha vendet anëtare kishin arritur objektivin për të shpenzuar të paktën 2% të Prodhimit të Brendshëm Bruto për mbrojtjen gjatë vitit të kaluar, një raport i medias holandeze “De Telegraaf” ngre dyshime mbi saktësinë e këtyre të dhënave.

Sipas artikullit, një verifikim i brendshëm i NATO-s ka zbuluar se tre vende anëtare nuk e kanë përmbushur në të vërtetë pragun e kërkuar prej 2%, pavarësisht se fillimisht raportuan se e kishin arritur atë.

Duke cituar një zyrtar të lartë të Aleancës, gazeta shkruan se disa vende kanë përfshirë në llogaritje shpenzime që sipas rregullave të NATO-s nuk duhej të konsideroheshin pjesë e buxhetit të mbrojtjes.

Sipas burimeve të cituara, Shqipëria dhe Sllovenia rezultojnë ndër vendet me performancën më të dobët, duke mbetur rreth 0.5 pikë përqindjeje nën objektivin e vendosur.

Burime të tjera brenda NATO-s paralajmërojnë se këto vende rrezikojnë të mos e arrijnë sërish nivelin 2% edhe gjatë këtij viti. Gjithashtu, sipas raportit, shqetësime ekzistojnë edhe për Hungarinë.