Shekerinska me mesazh të fortë nga Samiti i NATO-s: Putini nuk do ta thyejë Ukrainën

Aleatët evropianë dhe Kanadaja po arrijnë rezultate historike në investimet për sigurinë e tyre, duke krijuar një marrëdhënie më të barabartë brenda partneritetit transatlantik dhe duke e forcuar më tej Aleancën e NATO-s. Kështu u shpreh zëvendëssekretarja e përgjithshme e NATO-s, **Radmila Shekerinska**, në një intervistë ekskluzive për 4tv.mk, realizuar gjatë Samitit të NATO-s në Ankara.

Duke folur për angazhimet e reja të vendeve anëtare për rritjen e shpenzimeve për mbrojtjen, Shekerinska theksoi se Evropa më në fund po i tejkalon mangësitë shumëvjeçare në investimet për sigurinë.

> “Vetëm gjatë një viti, aleatët evropianë dhe Kanadaja investuan mbi 139 miliardë dollarë amerikanë, që paraqet një rritje të njëhershme prej rreth 20 për qind krahasuar me vitin paraprak. Kjo është dëshmi se këto vende nuk japin premtime që nuk mund t’i përmbushin, por ndërmarrin hapa konkretë për sigurinë e tyre”, tha Shekerinska.

Ajo shtoi se nuk është më e arsyeshme që shtetet më të pasura evropiane të presin që dikush tjetër ta financojë dhe garantojë sigurinë e tyre, duke vlerësuar se marrja e një pjese më të madhe të barrës nga aleatët evropianë do të kontribuojë në marrëdhënie më të forta dhe më të qëndrueshme me **Shtetet e Bashkuara të Amerikës**.

Në intervistë, Shekerinska foli edhe për mbështetjen që NATO i ofron Ukrainës, duke theksuar se në Samitin e Ankarasë të gjitha 32 vendet anëtare edhe një herë konfirmuan përkushtimin e tyre për vazhdimin e ndihmës.

Sipas saj, Rusia mbetet sfida kryesore për sigurinë euroatlantike, ndërsa Aleanca po dërgon një mesazh të qartë se nuk do të heqë dorë nga mbështetja për Ukrainën.

> “Plot 99 për qind e ndihmës ushtarake që e mban Ukrainën vjen nga vendet anëtare të NATO-s, ndërsa 95 për qind e mbrojtjes ajrore sigurohet përmes programeve të Aleancës. Për këtë vit është dakorduar një mbështetje prej 70 miliardë dollarësh dhe një nivel i tillë ndihme pritet të vazhdojë edhe në të ardhmen”, tha Shekerinska.

Ajo nënvizoi se ky është një sinjal i fortë jo vetëm për popullin ukrainas, por edhe për Moskën.

> “Ky është një mesazh për Ukrainën se nuk është vetëm, por edhe një mesazh për Moskën se presioni do të vazhdojë derisa të krijohen kushtet për negociata të mirëfillta paqeje. Putini nuk mund të presë që ne të dorëzohemi ose që Ukraina të detyrohet të heqë dorë. Qëllimi është të krijohen kushtet për një paqe të drejtë dhe afatgjatë”, deklaroi Shekerinska.

Ajo rikujtoi se NATO është një aleancë e përbërë nga 32 shtete demokratike me tradita dhe interesa të ndryshme politike, por pikërisht aftësia për të arritur konsensus përbën një nga përparësitë më të mëdha të Aleancës.

Si shembull të veprimit të përbashkët, Shekerinska përmendi aksionin e fundit të koordinuar të mbrojtjes ajrore të NATO-s, e cila, sipas saj, arriti të neutralizojë me sukses një sulm iranian të drejtuar ndaj Turqisë, duke e cilësuar këtë si një tjetër dëshmi të efektivitetit dhe unitetit të Aleancës kur rrezikohet siguria e vendeve anëtare.