Dosje të djegura dhe ambient i shkatërruar, Top Channel sjell pamjet ekskluzive brenda Gjykatës së Lartë (VIDEO)

Këto janë pamjet nga ambientet e brendshme të Gjykatës së Lartë, një ditë pasi protestuesit i vendosën flakën gjatë tubimit.

Në pamjet e filmuara nga gazetarja e Top Channel, Anila Hoxha, shihen dosjet e djegura dhe ambientet e shkatërruara.

Hoxha bën me dije se janë djegur afro 40 dosje gjyqësore. Gjykata e Lartë ndahet me një shtyllë betoni nga subjekti të cilit iu vendos flaka nga protestuesit mbrëmjen e djeshme.

Pasi është dëmtuar subjekti privat, flakët kanë kaluar edhe në katin e parë, ku ndodhen zyrat e sekretarive gjyqësore. Për fat të mirë, flakët nuk janë përhapur në katin e nëndheshëm, ku janë të depozituara mijëra dosje.

Burime të Prokurorisë i thanë Anila Hoxhës se po hetohet dhe është konstatuar se dy net më parë janë çmontuar dhe shkatërruar kamerat.

Kjo metodë e shkatërrimit të kamerave po vërehet në shumicën e rrugicave që lidhen me Bulevardin.