Sulmet izraelite në Gaza vrasin tetë persona, përfshirë një fëmijë, bëjnë të ditur spitalet

Sulmet izraelite në Gaza kanë vrarë të paktën tetë persona, përfshirë një fëmijë, sipas burimeve spitalore, pavarësisht një armëpushimi që është në fuqi prej një viti, ka raportuar BBC, transmeton Gazeta Express.

Në qytetin e Gazës, në veri, zyrtarë të spitalit thanë se një sulm me raketë goditi një grup civilësh pranë shkollës “Cairo” në lagjen Al-Rimal, duke vrarë tre persona, mes të cilëve një djalë katërvjeçar.

Në qytetin jugor Khan Younis, Ministria e Brendshme – e drejtuar nga Hamasi – njoftoi se një sulm me dron kishte vënë në shënjestër një grup oficerësh policie në zonën Al-Mawasi, duke vrarë pesë prej tyre ndërsa kryenin detyrat e tyre të zakonshme.

Ushtria izraelite deklaroi se kishte kryer dy sulme ndaj atyre që i përshkroi si “operativë ushtarakë”, por ende nuk ka ofruar prova apo informacione të mëtejshme.

Jashtë spitalit “Al-Shifa” në qytetin e Gazës, pamjet video tregonin një grup burrash të mbledhur për t’u lutur pranë dy qeseve mortore dhe trupit të vogël të fëmijës, i cili ishte mbështjellë me një peshqir të bardhë.

“Djali im dhe fëmija i tij ranë dëshmorë. Ata ishin ulur në tendën e tyre, pa shqetësuar askënd, dhe në zonë nuk po ndodhte asgjë tjetër, kur papritur një raketë i goditi dhe ata ranë dëshmorë,” tha Ali Oweis për agjencinë e lajmeve AFP. “Nuk ka asnjë armëpushim; lufta vazhdon, a nuk e shihni?”

Në spitalin “Nasser” në Khan Younis, pamjet tregonin gra të dëshpëruara pranë qeseve mortore që ndodheshin në dysheme. Ministria e Brendshme bëri të ditur emrat e pesë oficerëve të policisë të vrarë – të moshës 23 deri në 53 vjeç – dhe e cilësoi sulmin si një “masakër të tmerrshme”.

Një armëpushim hyri në fuqi në Gaza në tetor të vitit të kaluar, por sulmet ajrore izraelite kanë vazhduar pothuajse çdo ditë.