Koçani / Një pacient akoma në gjendje kritike

Gati tre muaj nga tragjedia në diskotekën “Pulse” në Koçan një pacient ende vazhdon të mbetet në gjendje kritike. Këtë e konfirmoi drejtori i Fondit Shëndetësor, në panel diskutimin “Koçani prioriteti ynë” i cili tha se aktualisht 12 pacientë vazhdojnë të marrin trajtime spitalore, prej tyre shtatë janë jashtë vendit. Ndërsa theksoi se vendi ka kapacitet të organizojë trajtimin e mëtejshëm dhe rehabilitimin e pacientëve nga tragjedia e Koçanit.

“Prej të tjerëve që po trajtohen kemi 15 në (PRT) piereks tretman, që d.m.th tretman me plazma që njëri është i pasur me trombocite, tjetri është pa trombocite, gjashtë janë në Klinikën e Kirurgjisë Plastike dhe 10 në Shën Naumi i Ohrit, me lidhje të fashave dhe trajtime të ngjashme kemi 38 të lënduar, katër në 8 Shtatori, 26 në Shën Naumi i Ohrit, në terapi fizikale janë 46 persona, të gjithë në Koçan,” tha Sashko Klekovski, drejtor i Fondit Shëndetësor.

Panel diskutimin e mbajtur sot, partia opozitare e LSDM-së e sheh si të turpshme dhe ç’njerëzore.

“Koçani definitivisht nuk është prioritet për Qeverinë. Qeveria e ka refuzuar ligjin për ndihmë të familjarëve të viktimave dhe të lënduarve. Ka refuzuar financiarisht të ju ndihmojë, përderisa prindërit japin dorëheqje nga punët për të kujdesur për fëmijët e lënduar. Deputetet e DPMNE-së si qyqarë më të mëdhenj fshihen në zyrat e Kuvendit vetëm për të mos u përballur me prindërit. Klekovski gjithashtu duhet të fshihet nga opinioni, spitali i Kopanit ende nuk ka pajisje mjekësore bazë,” deklaroi Bogdanka Kuzeska, zëdhënëse e LSDM-së.

Në tragjedinë e 16 marsit në Koçan ku diskoteka Puls u kaplua nga zjarri, humbën jetën 62 persona. Hetimet për tragjedinë përfunduan javën e kaluar, ndërsa të dyshuar janë 46 persona, 11 prej të cilëve janë në paraburgim.