Terminet për lidhje të martesave dhe regjistrimi i të porsalindurit do të bëhet online, njoftoi Andonovski

Ministri për Transformim Digjital, Stefan Andonovski, njoftoi se do të hapen terminale për shërbime ku qytetarët do të kenë qasje në shërbimet bazë, si dhe do të miratohet një ligj për aksesueshmërinë e personave me aftësi të kufizuara në faqet web dhe aplikacionet mobile të institucioneve.

Në vitin e fundit janë shtuar 120 shërbime digjitale të reja, janë reduktuar radhët në sportelet e institucioneve, dhe shërbimet më të kërkuara janë më të shpejta dhe më efikase, tha ministri Andonovski.

“Numri i transaksioneve në portal është rritur nga 1,000 në 6,000 në muaj, që tregon qartë se njerëzit po përdorin shërbimet elektronike shumë më shumë se më parë. Po ashtu, radhët në sportele, sidomos në Drejtorinë për Regjistrimin Civil, janë dukshëm më të vogla krahasuar me vitin e kaluar. Synimi ynë është që të gjitha shërbimet e kësaj drejtorie, si regjistrimi i lindjes, regjistrimi i martesave dhe terminet për martesë, të ofrohen përmes portalit kombëtar uslugi.gov.mk. Ne kemi premtuar që regjistrimi i lindjeve të jetë një nga shërbimet e para të plota dhe digjitalizuara dhe do ta përfundojmë këtë brenda këtij viti,” tha Andonovski.

Ministri gjithashtu theksoi se po punohet në një aplikacion qeveritar që do të jetë i disponueshëm për të gjithë qytetarët dhe do të përfshijë qasje në të gjitha shërbimet e portalit kombëtar.

“Me aplikacionin, synojmë që qytetarët ta kenë në telefonat e tyre dhe të kenë mundësi të përdorin këto mjete digjitale, versionin elektronik të kartës së identitetit dhe patentës së vozitjes, si dhe shërbimet elektronike. Vendimi për një aplikacion të vetëm është që të integrohen të gjitha shërbimet shëndetësore, administrative dhe të tjera,” tha Andonovski.